प्रधानन्यायाधीश चोलेन्द्र शमशेर जबराले मार्ग प्रशस्त गर्नुपर्ने माग गर्दै आएका सर्वोच्च अदालतका न्यायाधीशहरूले बदलिँदो परिस्थितिमा बन्दी प्रत्यक्षीकरणका मुद्दा समेत हेर्न नसकिने परिस्थिति उत्पन्न भएको निष्कर्ष निकालेका छन् ।

बन्दीका मुद्दा मात्र हेर्दै आएकोमा नेपाल बार एसोसिएसनले इजलास बहिस्कार गर्ने भएपछि सुनुवाइ हुन नसक्ने निष्कर्ष निकालिएको एक न्यायाधीशले लोकान्तरलाई जानकारी दिए ।

‘आजपनि हामीहरूले छलफल गर्‍यौं । शुक्रवारसम्म बन्दीको मात्र मुद्दा हेर्ने भनेका थियौं । शुक्रवार बारले कुनै पनि मुद्दामा बहस नगर्ने भन्ने कुरा आयो । कानून व्यवसायीमाथि धरपक्कड र हातपात भएको बदलिँदो परिस्थितिमा कुनैपनि मुद्दाको सुनुवाइ हुने भएन,’ बैठकपछि एक न्यायाधीशले लोकान्तरसँग भने, 'बार नै नआएपछि हामी जाने कुरा भएन । बारको सहभागिताविना हामीले मात्र सुनुवाइ र फैसला गर्न पनि मिलेन ।'

उनले भोलिको स्थिति हेरे थप निर्णय लिने बताए ।

प्रधानन्यायाधीश र न्यायाधीशहरूबीच संवादहीनता

उनले प्रधानन्यायाधीश र न्यायाधीशहरूबीच संवादहीनताको अवस्था रहेको जानकारी दिए ।

केही दिनयता राणासँग न्यायाधीशहरूको औपचारिक संवाद नभएको उनको भनाइ छ ।