आइतबारलाई सर्‍यो कांग्रेसको विरोध प्रदर्शन

नेपाली कांग्रेसले गृहमन्त्री रवि लामिछाने सहकारी प्रकरणमा संलग्न रहेको भन्दै छानबिन समिति गठनको लागि आगामी आइतबार विरोध प्रदर्शन गर्ने भएको छ । 

बुधबार पार्टी मुख्यालयमा बसेको कांग्रेसको केन्द्रीय कार्यसमिति तथा संसदीय दलको संयुक्त बैठकले यस्तो निर्णय गरेको हो ।

यस अघि शुक्रबार विरोध प्रदर्शन गर्ने गरी प्रस्ताव ल्याए पनि आवश्यक तयारी नपुग्ने भन्दै विरोध प्रदर्शनको कार्यक्रम आइतबार गर्न लागिएको केन्द्रीय सदस्य डिला संग्रौलाले जानकारी दिइन् ।

‘नेपाली कांग्रेसले सहकारी ठगीको गृहमन्त्री संलग्न रहेको भन्दै लामो समयदेखि संसदीय छानबिन गठनको माग गर्दै आएको छ । तर सरकारले आलटाल गरेको सडकबाटै दबाब बढाउने निर्णय कांग्रेसले गरेको छ', संग्रौलाले लोकान्तरसँग भनिन्, ‘सहकारी पीडितको रकम फिर्ता, सदनमा असंसदीय कदम चालिएको विषयमा पनि दबाब बढाउन कांग्रेसले आइतबार काठमाडौंमा विरोध प्रदर्शन गर्ने निर्णय गरेको छ ।’

काठमाडौं उपत्यकाका तीन जिल्लाका कांग्रेस सभापतिसँगको छलफलपछि कांग्रेस आइतबार विरोध प्रदर्शन गर्ने निर्णयमा पुगेको हो ।