नेपाल उद्योग वाणिज्य महासंघका अध्यक्ष शेखर गोल्छाले राजस्व संकलनमा केन्द्रित भई कर प्रणालीलाई व्यवस्थित बनाउनेतर्फ अर्थ मन्त्रालयको ध्यानाकर्षण गराएका छन् ।

काठमाडौंमा बुधवार १०औं राष्ट्रिय कर दिवसको अवसरमा आयोजित कार्यक्रममा करको दायरा बढाउनभन्दा कर संकलनलाई व्यवस्थित बनाउनेतर्फ केन्द्रित हुनुपर्नेमा उनले जोड दिए ।

अध्यक्ष गोल्छाले सरकार राजस्व संकलनका लागि बढी केन्द्रित भएकाले समग्र कर प्रणाली चुस्तदुरुस्त हुन नसकेको बताए । उनले सरकारको ध्यान कसरी राजस्व बढी संकलन गर्ने भन्नेमा बढी केन्द्रित भएकाले कर प्रणाली व्यवस्थित र प्रभावकारी हुन नसक्दा विकास खर्च बढ्न नसकेको बताए ।

अध्यक्ष गोल्छाले भने, ‘सरकारले जुन तदारुकताका साथ कर संकलन गरिरहेको छ । सोही अनुसार विकास खर्च गर्न नसक्दा पछिल्लो समय बजारमा तरलताको समस्या आएको छ । विकास खर्च भएको भए यो समस्या आउने थिएन तर तरलता व्यवस्थापन निकै ठूलो समस्या भएको छ तर सरकार राजस्व संकलनमा केन्द्रित हुन म पुनः एक पटक भन्छु, उद्देश्य ठीक छ तर अर्थ मन्त्रालय विकास खर्च गर्न पनि त्यही अनुसार गतिशील हुन जरुरी छ ।’

अध्यक्ष गोल्छाले सरकारले बजेट निर्माण गर्दा नै आयोजनाहरू छनोटको प्राथमिकता निर्धारण गरी अनावश्यकलाई समावेश गर्न नहुने तर्क गरे ।

नेपाल चेम्बर अफ कमर्सका अध्यक्ष राजेन्द्र मल्लले सरकारले प्रक्षेपण गरेअनुसार राजस्व संकलन हुन नसकेको बताए ।

उनले भने, ‘सरकारले करको दायरा बढाउन बैंकिङ प्रणालीभन्दा बाहिर बसेर अर्बौंको कारोबार गरिरहेका व्यवसायीलाई करको दायरामा ल्याउनुपर्छ । करको दायरा बढाउनका लागि प्रशस्त ठाउँ छ । अर्बौं कारोबार हुने घरजग्गा जस्ता अन्य कारोबारलाई करको दायरामा ल्याउनुपर्छ । सरकारले घरजग्गाको कारोबारलाई करको दायरामा ल्याउन नसक्दा जग्गाको मूल्य मौखिक रूपमा नै बढ्दै गएको छ ।’

नेपाल उद्योग परिसंघका कार्यकारी अध्यक्ष कृष्णप्रसाद अधिकारीले विगत २४ वर्षदेखि बहुदर प्रणाली लागू गर्न माग गर्दै आएपनि अहिले सम्म लागु हुन नसकेको गुनासो गरे ।