अस्ट्रेलिया र दक्षिण कोरियाबीच लगभग ७१.७० करोड डलर बराबरको रक्षा सम्झौताका लागि सहमति बनेको छ । 

दक्षिण कोरियाको हतियार निर्माता कम्पनी हनवाले अस्ट्रेलिया सेनालाई अत्याधुनिक हतियार, सैन्य वाहन र रेडारको आपूर्तिका लागि सम्झौतामा हस्ताक्षर गरेका छन् । 

अस्ट्रेलिया भ्रमणमा रहेका दक्षिण कोरियाली राष्ट्रपति मून जे–इनले यो सम्झौतामा हस्ताक्षर गरेका हुन् । 

कोरोना महामारी शुरू भएपछि पहिलोपटक अस्ट्रेलिया भ्रमण गरेर मूनले दुई देशबीचको सम्बन्धलाई बलियो बनाउन खोजेको सन्देश दिएका छन् । सुरक्षाका विषयमा अमेरिकाका साझेदार मुलुकहरू अस्ट्रेलिया र दक्षिण कोरियाको समान मत रहेको यसबाट देखिन्छ ।

अस्ट्रेलिया र दक्षिण कोरियाबीचको कूटनीतिक सम्बन्ध ६० वर्षभन्दा पुरानो छ । कोरियाली युद्धमा दक्षिण कोरियाका सैनिकहरूसँगै मिलेर अस्ट्रेलियाका सैनिकहरू लडेका थिए । 

दुई देशबीच आर्थिक सम्बन्ध पनि बलियो छ । सन् २०१४ मा खुला व्यापार सम्झौता गरेर यी दुई देशले आर्थिक सम्बन्ध घनीभूत बनाउन खोजेका थिए । यसलाई व्यापक रणनीतिक साझेदारीमा स्तरोन्नति गर्ने विषयमा दुई देशबीच सहमति बनेको देखिन्छ ।