काठमाडौं महानगरका प्रमुख विद्यासुन्दर शाक्यले सम्पदा पुनर्निर्माणका लागि महानगरसँग नीति, कार्यक्रम र बजेटको अभाव नभएको स्पष्ट पारेका छन् ।

कामपा–१८ मा रहेको देवघरको खरु पूजा (मूल ढोकाको पूजा) गर्दै प्रमुख शाक्यले बजेट अभाव नभएको जानकारी गराए ।

देवघरको पुनर्निर्माण भइरहेको छ । पूजापछि अमूर्त सम्पदासँग जोडिएका मूर्त सम्पदा संरक्षणका विषयमा कुरा गर्दै प्रमुख शाक्यले परम्परागत एवं तान्त्रिक नाच, वाद्यवादन, शृंगारजस्ता धार्मिक, सांस्कृतिक र सामाजिक क्रियाकलापले काठमाडौंका मूर्त सम्पदालाई जीवन्त बनाइराखेको उल्लेख गरे ।

‘एकको अभावमा अर्को अधुरो हुन्छ । त्यसैले हामीले सम्पदासँग जोडिएका सबै पक्ष (मूर्त–अमूर्त) जोगिने गरी पुनर्निर्माणका लागि राज्यका तर्फबाट लगानी गर्नुपर्छ,’ उनले भने । त्यसक्रममा वडा नम्बर १८ का अध्यक्ष एवं सम्पदा तथा पर्यटन समितिका संयोजक न्हुच्छेकाजी महर्जनले देवघर पुनर्निर्माणका लागि वडाले महानगरसँग गर्नुपर्ने प्रशासनिक र प्राविधिक समन्वयमा कमी हुन नदिने बताए ।

भवन निर्माणका लागि ६ करोड लाग्ने अनुमान गरिएको छ । महानगरले यसका लागि गएको वर्ष १ करोड र चालू आर्थिक वर्षका लागि १ करोड रुपैयाँ छुट्याएको छ । किस्ता–किस्तामा गरी कामपाबाट १ करोड २८ लाख ५८ हजार रुपैयाँ प्राप्त भइसकेको निर्माण समितिका कोषाध्यक्ष राजा महर्जनले बताए ।

देवी नाचमा ७ जना देवगण हुने भएकाले भवनलाई ७ तले बनाइने भएको छ ।