बँदेल, नीलगाई र बाँदरलगायतका वन्यजन्तुले अन्न तथा तरकारी बाली खाएर सखाप पार्न थालेपछि धनुषाका किसानले नयाँ जुक्ति अपनाएका छन् । यहाँका किसानले खेतबारीमा झिलिमिली बिजुली बत्ती बालेर वन्यजन्तुको उपद्रोबाट बालीनाली जोगाउन नयाँ उपाय लगाएका हुन् ।

दीपावलीमा घर झिलिमिली बनाउन प्रयोग गरिएका बिजुली बत्ती अहिले यहाँका किसानले जङ्गली जनावर धपाउन उपयोगमा ल्याएका हुन् । झिलिमिली बत्ती देखेर बँदेल, नीलगाई र बाँदरलगायतका वन्यजन्तु खेतबारीमा नआउने र उत्पादन गरेको अन्न तथा तरकारी बाली जोगिने किसानले बताएका छन् ।

दिउँसो रेखदेख गर्न सकिने भए पनि राति खेतबारीमै बस्न नसकिने हुँदा जङ्गली जनावर धपाउन झिलिमिली बत्ती तथा उज्यालो प्रकाश दिन बल्ब बाल्ने गरेको मिथिला नगरपालिका–६, ढल्केबरका किसान नेमलाल महतोले बताए । झिलिमिली बत्ती बालेदेखि वन्यजन्तु खेतबारीमा नआएको र बालीनाली सुरक्षित रहने गरेकोे उनले सुनाए।

किसान नेमलालले आफ्नो टोल देखाउँदै भने, “यो टोलमा ३०० भन्दा बढी किसानका घर छन् । बालीनाली जोगाउन सबैले यही तरिका अपनाएका छन् । साँझ पर्ने बेला घरसँगै खेतबारीको पनि बत्ती बालिन्छ । ” तिहारमा घर ल्याएको झिलिमिली बत्ती अहिले तरकारी बारीमा प्रयोग गरेको अर्का किसान सोमप्रसाद लामाले बताए।

खेतबारीमा पिलिक–पिलिक बत्ती बलेको देखेर वन्यजन्तु डराएर आउँदैनन् र बालीनाली जोगिने गरेको छ । खेतबारीमा बाल्न प्रयोग गरेको बिजुलीका कारण उत्पादनमा लागत बढे पनि बाली जोगाउन गरिएको थुप्रै प्रयास खेर नगएको उनले बताए । “बालीनाली जोगाउन बलिया घेराबेरा लगायो, नीलगाई र बँदेलले भत्काइदिन्छ । अन्तिम विकल्पका रूपमा झिलिमिली बत्ती बाल्न थालेका हौँ,” लामाले भने। गोरखापत्र दैनिकमा विजयकुमार साहले खबर लेखेका छन् ।