बागमती  प्रदेश सरकारले  प्रदेश  सरकार  गठन  भएयता सम्पादन गरेका कामको श्वेतपत्र जारी गर्ने भएको छ ।

प्रदेश सरकार गठन भएको चार वर्ष  पुग्नैलाग्दा  विगतका  सरकारले  गरेका कामको अध्ययन गरेर गठबन्धन सरकारले श्वेतपत्र जारी गर्ने निर्णय गरेको हो ।

बागमती   प्रदेशको   बिहीबार   यहाँ बसेको  मन्त्रिपरिषद्  बैठकले  चार  वर्षको अवधिमा  प्रदेश  सरकारले  सम्पादन  गरेका कामको  श्वेतपत्र  जारी  गर्ने  निर्णय  गरेको सरकारका  प्रवक्ता  एवं  आन्तरिक  मामिला तथा कानुनमन्त्री कृष्णप्रसाद शर्मा खनालले जानकारी दिए।

उनले प्रदेश सरकारले चार वर्षमा गरेका काम, अनुभवको समीक्षा र  यसबाट  शिक्षा  लिएर  आगामी  दिनमा सुधारका  कार्य  गर्नुपर्ने  भएकाले  विगतको नीति   तथा   कार्यक्रम,   बजेटलगायतका विषयमा   भएको   प्रगति,   चुनौती   र कमीकमजोरीलाई समेटेर श्वेतपत्र जारी गर्न लागेको बताए ।

उनले श्वेतपत्र जारी गर्न  आर्थिक  मामिला  तथा  योजनामन्त्रीको संयोजकत्वमा  उच्चस्तरीय  समिति  निर्माण गरेको  जानकारी  दिँदै  सदस्यमा  आन्तरिक मामिला  तथा  कानुनमन्त्री, स्वास्थ्यमन्त्री र  प्रदेश  नीति  तथा  योजना  आयोगका उपाध्यक्ष रहने बताए । गोरखापत्र दैनिकमा खबर छ ।