नेपाल वायुसेवा निगमको डेढ महिनादेखि दोहामा थन्किएको एक न्यारोबडी जहाज बल्ल आवश्यक मर्मत प्रक्रियामा लगिएको छ । 

जहाजको इन्जिनमा समस्या आएर थन्किएको यो जहाज उडाउन इन्जिन भाडामा लिने र बिग्रिएको इन्जिन मर्मत गर्न प्रक्रिया अगाडि बढेको निगमले जानकारी दिएको छ ।

निगमको ए ३२०–२०० नामक ९ एन–एकेडब्लु कलसाइनको सगरमाथा विमान  १३ पुसदेखि दोहामा थन्किएको छ । 

यो जहाज काठमाडौं–दोहाको उडान नम्बर आरए–२३ बाट नियमित उडानबाट कतार गएको थियो । उक्त जहाज अवतरणपछि पार्किङ गर्ने क्रममा विमानको एउटा इन्जिनमा प्राविधिक समस्या देखिएको थियो ।

दोहास्थित कतार एयरवेजका इन्जिनियरिङ टिमले यसको थप निरीक्षण गर्दा बायाँतर्फको इन्जिनमा ‘इन्टरनल डिफेक्ट’ पहिचान भएको थियो । 

यसको इन्जिन फेर्नुपर्ने भएकोले उक्त इन्जिनको उत्पादनकर्ता पीडब्लु/आएईसँग निगम व्यवस्थापनले आवश्यक परामर्श लिएर इन्जिनलाई फेरेर मर्मत गर्न सुझाव दिएको थियो । 

सोही सुझावअनुसार जहाजलाई उडानयोग्य अवस्थामा ल्याउन इन्जिन भाडामा लिनुपर्ने निष्कर्ष निकालिएको निगमको भनाइ छ । 

जहाजको प्राविधिक प्रतिवेदनहरूको आधारमा निगमको नियमअनुसार इन्जिन भाडामा लिनको लागि निगमले मिति ९ जनवरी २०२२ मा ग्लोबल प्रस्ताव (आरएफपी) मागिसकिएको पनि निगमका प्रवक्ता अर्चना खड्काको भनाइ छ ।

आवश्यक प्रक्रिया पुर्‍याएर इन्जिन भाडामा लिने काम अगाडि बढिसकेको निगमले सोमवार एक प्रेस विज्ञप्ति जारी गरेरै जानकारी दिएको छ । 

जहाजको लागि आवश्यक इन्जिन एमटीयू मेन्टिनेन्स लिज सर्भिस बीभी कम्पनी छनोट गरेर इन्जिन भाडामा लिने कार्य अगाडि बढेको निगमको भनाइ छ ।