एमसीसीको विरोधमा प्रदर्शन गर्दा बुटवलबाट सोमबार १७ जना प्रदर्शनकारी पक्राउ परेका छन् । एमसीसी देशको हितप्रतिकूल रहेको भन्दै ६ दलीय मोर्चाले नेपाल बन्द आह्वान गरेको छ । 

इलाका प्रहरी कार्यालय, बुटवलका प्रहरी प्रमुख ठगबहादुर केसीका अनुसार प्रदर्शन गर्दै आएका १७ जनालाई बसपार्क र हस्पिटल लाइनबाट पक्राउ गरिएको हो ।

प्रहरीले वामपन्थी नेता तथा कम्युनिस्ट संग्रहालयका अध्यक्ष चेतनाथ आचार्य, राष्ट्रिय जनमोर्चाका नेता बासुदेव पोखरेल, नेकपा क्रान्तिकारी माओवादीका पोलिटब्यूरो सदस्य प्रेम सुवेदी, लेखक तथा साहित्यकार खोमा तरामु, वीरेन्द्र विक, पारस राहादी, इन्दु ओली, जानकी बोहोरा लगायत १७ जनालाई पक्राउ गरेको छ ।

उनीहरूलाई इलाका प्रहरी कार्यालय बुटवलमा राखिएको छ ।

यस्तै पाल्पा, अर्घाखाँचीलगायत देशका विभिन्न स्थानबाट पनि प्रहरीले बन्दकर्तालाई पक्राउ गरेको छ ।