नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेकपा एमालेका अध्यक्ष केपी शर्मा ओलीले आफूलाई निषेधात्मक व्यवहार गरेको गुनासो गरेका छन् ।

अमेरिकी आर्थिक सहयोग कार्यक्रम एमसीसीको विषयलाई लिएर भेट्न जाँदा ओलीले निषेधात्मक व्यवहार देखाएको उनले बताए ।

‘एमसीसी समस्या समाधानका लागि हामी केपी ओली र उहाँको समूहका नेतासँग गएका थियौं । देश अप्ठ्यारोमा पर्‍यो निकास दिऊभन्दा उहाँले सभामुखलाई कारवाही गरेर आउनुस्, नेकपाकालको १९ पेज लामो आरोप खारेज गरेर आउनुहोस् भनेपछि, यति निषेधात्मक सोच भएकासँग किन आइएको रहेछ भन्ने लाग्यो,’ बिहीवार बुटवलमा प्रेस सेण्टरले आयोजना गरेको पत्रकार सम्मेलनमा प्रचण्डले भने । 

माओवादी नेता वर्षमान पुनले एमालेसँग चुनावी तालमेलको ‘च्याप्टर क्लोज’ भएको छैन भनेर दिएको अभिव्यक्तिबारे सोधेको प्रश्नको जवाफमा प्रचण्डले त्यसो भनेका हुन् । सो भेट फागुन १५ अगावै भएको र त्यो बेला प्रचण्डले एमसीसीको विपक्षमा मतदान गरेमा ओलीलाई प्रधानमन्त्री बनाउन प्रस्ताव गरेको भन्ने चर्चा चलेको थियो । 

‘अहिले हामी गठबन्धनमा छौं, सरकार पनि त्यसैगरी छ । तत्काल एमालेसँग तालमेल हुने सम्भावना देखेका छैनौं । हुन त देशको अगाडि समस्या आएपछि, संकटको निकास दिनका लागि माओवादीले जतिसुकै तीतोमिठो भए पनि निकास निकाल्ने कोसिस गरेको छ, त्यही विचारका कारण युद्धलाई शान्ति र निर्वाचनमा लगिएको हो,’ प्रचण्डले भूमिका बाँध्दै भने, ‘एमसीसी समस्या समाधानका लागि नारायणकाजीजी र म ओली र उहाँको समूहका नेतासँग गएका थियौं । देश अप्ठ्यारोमा पर्‍यो, निकास दिऊभन्दा सभामुखलाई कारवाही गरेर आउनुस्, नेकपाकालको आरोप खारेज गरेर आउनुहोस् भनेपछि यति निषेधात्मक सोच भएकासँग किन आइएको रहेछ भन्ने लाग्यो ।’

पटक–पटक गरिएको प्रतिनिधिसभा विघटनको गलत कदम सही थियो भन्ने पार्नका लागि एमालेले विना कारण संसद अवरुद्ध गरिरहेको प्रचण्डले आरेप लगाए । ‘अहिले पनि प्रतिगमनको खतरा टरिसकेको छैन, सदन पटक–पटक विघटन गर्न चाहने तत्वलाई मलजल गर्ने, प्रतिगमनमा लैजाने कसरत रोकिएको छैन । सदन अवरुद्ध विना कारण छ, न कानूनी न संवैधानिक छ । अनाहकमा ससद अवरोध गरेको छ, सभामुखको निर्णयलाई चुनौती दिने आधार छैन । हिजोको कदमलाई पुष्टि गर्नका लागि सदन अवरुद्ध गरिरहेको छ,’ प्रचण्डले भने ।