मुख्य रजिस्ट्रार लालबहादुर कुँवरले उच्च अदालतको न्यायाधीश पदको नियुक्ति लिन अस्वीकार गरेका छन् ।

फागुन २६ गते बसेको न्यायपरिषद् बैठकको सिफारिशअनुसार कामु प्रधानन्यायाधीश दीपककुमार कार्कीले चैत २ गते कुँवरलाई पाटन उच्च अदालतको न्यायाधीशमा नियुक्तिको पत्र दिए पनि कुँवरले त्यसलाई अस्वीकार गरेका हुन् ।

कुँवरले कामु प्रन्या कार्कीलाई लिखित निवेदन नै दिएर आफूले न्यायाधीश पद स्वीकार नगर्ने बताएको सर्वोच्च अदालतका सूचना अधिकारी देवेन्द्र ढकालले जानकारी दिए ।

'म न्यायाधीश पदको सम्मान गर्छु, तर अहिले उक्त पद स्वीकार गर्न असमर्थ छु । म जुन पदमा छु, त्यही पदमा कार्यरत रहन पाऊँ भनेर उहाँले लिखित निवेदन नै दिनुभएको छ,' ढकालले लोकान्तरसँग भने ।

पढ्नुहोस्, यो पनि :

कामु प्रन्या कार्कीलाई पहिलो गाँसमै ढुंगा, साता बित्दा पनि आफ्नै निर्णय कार्यान्वयनमा असफल !

 

मुख्य रजिस्ट्रारलाई उच्च अदालतको मुख्य न्यायाधीश बनाउने परम्परा रहिआएकोमा आफूलाई न्यायाधीशमा मात्र सिफारिश गरिएको भन्दै कुँवर असन्तुष्ट छन् ।

कुँवरले न्यायाधीश पद अस्वीकार गरेसँगै कामु प्रन्या कार्कीलाई आफ्नो पहिलो निर्णय कार्यान्वयनमै असफलता हात लागेको छ ।