इमर्जिङ नेपालका लगानीकर्ताले कमाउँदा जलविद्युत क्षेत्रका लगानीकर्ताले भने गुमाउन पुगेका छन् । 

मंगलवार शेयर बजार मापक परिसूचक नेप्से १६.०४ अंकले बढेको छ । बजार बढेको भए पनि कुल कारोबार रकम भने साढे २ अर्ब रूपैयाँ मात्रै रहेको छ । नेप्से आज ०.६१ प्रतिशतले बढेर २६५०.७० बिन्दुमा पुगेको छ ।

बजार बढेको दिन सबैभन्दा बढी कमाउनेमा इमर्जिङ नेपाल लिमिटेड रहेको छ । यसका लगानीकर्ताले आज ९.९९ प्रतिशतले कमाएका छन् । आज कमाउनेमा राष्ट्र उत्थान लघुवित्त, नेपाल लाइफ इन्स्योरेन्स, समता घरेलु लघुवित्तसहितका लगानीकर्ता छन् । 

बजार बढेको भए पनि धेरै गुमाउने कम्पनीको सूचीमा भने जलविद्युत कम्पनीका लगानीकर्ता छन् । कालिका पावर कम्पनी, न्यादी ग्रुप पावर, मैलुङ खोला जलविद्युत कम्पनी, शिवश्री हाइड्रोपावरसहितका लगानीकर्ताले भने आज २.१६ देखि २.८१ प्रतिशतसम्मले गुमाएका छन् ।

प्रभु इन्स्योरेन्स कम्पनीको सबैभन्दा बढी ३ लाख ४० हजार कित्ता शेयरको कारोबार भएको छ भने यसको कारोबार रकम पनि १५ करोड ३३ लाख रूपैयाँ पुगेको छ ।