गठबन्धनमा कांग्रेसको प्रस्ताव– 'यथार्थवादी बनौं, बढाइचढाइले तालमेल अप्ठ्यारोमा पर्छ'

नेपाली कांग्रेसले चुनावी तालमेलका लागि आफ्नो हैसियतभन्दा बढी दाबी नगर्न गठबन्धनका दलहरूसँग आग्रह गरेको छ ।

स्थानीयस्तरमा दलहरूको वास्तविक हैसियत अनुसारको तालमेलले मात्र चुनाव जित्न सकिने कांग्रेसको टिप्पणी छ ।

पार्टी केन्द्रीय कार्यालय सानेपामा मंगलवार पत्रकार सम्मेलन आयोजना गरी कांग्रेस प्रवक्ता डा. प्रकाशशरण महतले स्थानीय परिस्थिति र आवश्यकताअनुसार मात्र चुनावी तालमेल हुने बताएका हुन् ।

पार्टीका कार्यकर्तालाई अन्याय हुनेगरी तालमेल नहुने उनले स्पष्ट पारे । 

‘हामीले गठबन्धनका नेतृत्वगणसँग अनुरोध पनि गरेका छौं, यथार्थवादी होऔं, सबैले आफ्ना कुरा बचाइचढाइ गर्दा तालमेल अप्ठ्यारोमा पर्छ,’ महतले भने, ‘रियालिस्टिक होऔं, जे आ–आफ्नो स्ट्रेन्थ छ, त्यसको आधारमा जहाँ आवश्यकता छ, त्यो अनुसार तालमेल गर्दा परिणाम आउँछ भन्ने कुरा उहाँहरूले पनि मनन गर्नुभएको छ ।’ 

प्रवक्ता महतले गठबन्धनमा तालमेलको कुराले स्थानीय तहको उम्मेदवार छनोटमा ढिलाइ भएको बताए । ‘टिकट तय गर्न केही समय लागेको छ । गठबन्धनबीच तालमेल गर्ने भएकाले ढिला भएको हो । सांसद् संख्या बाँडफाँड गरेजस्तो नभएकाले केही समय लागेको हो,’ महतले भने, ‘कसरी तालमेल गर्‍यौं भन्ने कुरा छिट्टै थाहा पाउनुहुनेछ । स्थानीय परिस्थिति र आवश्यकताअनुसार तालमेल गर्ने कुरा हो ।’ 

प्रवक्ता महतले कांग्रेसले फागुन २९ देखि आजसम्म सञ्चालन गरेको चुनावकेन्द्रित अभियानबाट जनतामा रहेको भ्रम चिर्न सफल भएको बताए । 

‘एमसीसीको भ्रम चिर्न सफल भयौं । साथै केपी ओलीले पाँच वर्षका लागि नेतृत्व पाउनुभएको थियो, त्यसलाई पूरा गर्न नसकी तीन वर्षमा असफल भएर हात उठाउनुभयो । जसले जिम्मेवारी पूरा गर्न सकिनँ भनेर बीचमै हात उठाए, उनलाई फेरि जिम्मेवारी दिने कुरा उपयुक्त हुँदैन भनेर जनतालाई कन्भिन्स गरेका छौं,’ महतले भने ।