नेकपा (माओवादी केन्द्र)ले सत्ता गठबन्धनबीच चुनावी तालमेल गर्दा चितवनको भरतपुर महानगरसहित ४ उपमहानगरपालिकाको मेयरमा दाबी गरेको छ । 

नेपाली कांग्रेसका नेता रामचन्द्र पौडेल नेतृत्वको स्थानीय तह चुनाव अनुगमन र परिचालन समितिको आइतवार बसेको बैठकमा माओवादीले भरतपुरसहित धरान, बाराको जीतपुर सिमरा, मकवानपुरको हेटौंडा र दाङको घोराही उपमहानगरमा दाबी पेश गरेको हो । 

२०७४ सालको स्थानीय तह निर्वाचनमा भरतपुर माओवादीले जितेको थियो । शुरूमा नेकपा एमालेले जितेको धरान उपमहानगरपालिका नेकपा विभाजन नहुँदै भएको उपचुनावमा कांग्रेसले बाजी मारेको थियो । 

हेटौंडा र जितपुर सिमरा उपमहानगरपालिका एमालेले जितेको थियो । माओवादी प्रवक्ता कृष्णबहादुर महराको निर्वाचन क्षेत्र रहेको दाङको घोराही पनि एमालेले जितेको थियो । 

बैठकमा सहभागी माओवादी नेताहरूले भरतपुरसहित चार उपमहानगर आफूहरूको बटमलाइन रहेको बताएका थिए । नेकपा (एस)ले पनि पोखरा महानगरसहित ३ उपमहानगर दाबी गरेको छ । जसपाले वीरगञ्ज महानगरसहित जनकपुर र नेपालगञ्ज उपमहानगरपालिकामा दाबी गरेको  छ । 

माओवादी, एस र जसपाको दाबीका कारण गठबन्धनमा सहमति जुट्न नसकेको हो । ‘माओवादी र नेकपा एसका तर्फबाट दाबी आएको छ, आजै सहमति जुट्न सकेको छैन,’ बैठकमा सहभागी कांग्रेसका एक नेताले भने । संयोजक पौडेलले दाबी पेश गर्न भनेपछि माओवादी र एसले दाबी पेश गरेका हुन् । 

सत्ता गठबन्धनबीच महानगर र उपमहानगरको भागबण्डा केन्द्रबाटै टुंगो लगाउने सहमति भएको छ ।