नेपाली कांग्रेसका महामन्त्री गगन थापाले नेपाली कांग्रेसका देशैभरका कार्यकर्ता चुनावी तालमेलको पक्षमा नरहेको बताएका छन् । चुनावपछि सरकार गठन गर्न तालमेल गर्नु उपयुक्त हुने भए पनि चुनाव जित्न तालमेल गर्नु उचित नभएको उनको भनाइ छ । 

सोमवार काठमाडौंमा आयोजित एक कार्यक्रममा महामन्त्री थापाले कांग्रेस मतदाताको मनोविज्ञान चुनावी तालमेलको विपक्षमा रहेको बताएका हुन् ।

‘नेपाली कांग्रेसको देशैभरिका साथीहरू, पार्टीका साथीहरू, शुभेच्छुक र मतदाता कोही पनि चुनावी तालमेलको पक्षमा हुनुहुन्न । मैले धेरै पहिलादेखि भन्दै आएको छु- कांग्रेस पार्टीको बनोट, मतदाताको मनोविज्ञान र स्वभाव नै बरु निर्वाचनमा हारे परेर हाराैँला भन्ने छ । राजनीति विचारसँग जोडिएको हुन्छ,’ थापाले भने, ‘निर्वाचन पछाडि कोहीसँग मिल्ने कुरा संसदीय व्यवस्थामा स्वभाविक भए पनि निर्वाचनभन्दा पहिला चुनाव जित्न गरिने तालमेल स्वभाविक हुँदैन ।’ 

महामन्त्री थापाले पार्टीको संस्थागत निर्णय स्थानीय आवश्यकताको आधारमा गठबन्धनबीच तालमेल गर्ने भन्ने रहेकोले सोहीअनुसार हुने बताए ।