बागमती प्रदेशको एक मात्र उपमहानगरपालिकाको रुपमा रहेको हेटौँडामा नेपाली कांग्रेसले गठबन्धनका दलसँग चुनावी तालमेल नगर्ने भएको छ । 

मंगलवार नेपाली कांग्रेस मकवानपुरको पार्टी कार्यालयमा भएको हेटौँडा उपमहानगरपालिकाको पदाधिकारी तथा १९ वटै वडा सभापतिको बैठकले नेपाली कांग्रेसले मेयर नपाएको अवस्थामा गठबन्धनबाट अलग रहेर निर्वाचनमा भाग लिने निर्णय गरेको हो । 

नेपाली कांग्रेस हेटौँडा उपमहानगरपालिका समितिका उपसभापति रामकृष्ण कोइरालाले मेयर नपाए गठबन्धन नगर्ने निर्णय भएको जानकारी दिए । 

पाँच दलीय गठबन्धनको केन्द्रीय बैठकले हेटौँडाको मेयर नेकपा (एकीकृत समाजवादी)लाई दिने औपचारिक प्रस्ताव गरेपछि आज हेटौँडा उपमहानगर समितिले यस्तो निर्णय गरेको हो । 

पार्टी कार्यालयमा बैठक भइरहँदा कार्यकर्ताहरूले गठबन्धन तोड्न नाराबाजी गर्नुको साथै कार्यालयमा तालाबन्दीसमेत गरेका थिए ।