अत्याधुनिक सेवासुविधासहित राजधानीमा नयाँ सिनेमा हल शुरू भएको छ ।

आरामदायी सुविधाका साथ सिनेमा पारखीहरूका लागि दरबारमार्गमा रहेको दरबार मलमा 'दरबार सिने म्याक्स' सञ्चालनमा आएको हो ।

दर्शकहरूलाई सिनेमा हेर्दा लक्जरियस महसुस गराउने उद्देश्यका साथ सीमित व्यक्तिहरूलाई मात्र सामेल गराएर चलचित्र देखाउने उद्देश्यका साथ नयाँ वर्षको अवसर पारी हल सञ्चालनमा ल्याएको दरबार सिने म्याक्सका प्रबन्ध निर्देशक दिप्रश शाक्यले जानकारी दिए। 

गुण ग्रुपद्वारा निर्माण भएको दरबार मलमा सञ्चालित दरबार सिने म्याक्स सिनेमा हल क्यूएफएक्सले व्यवस्थापन गरेको हो ।

सिनेमा हलभित्र दुईवटा हल छन् । ५० र ५३ जनाको सिट क्षमता भएको सो हलमा अत्याधुनिक साउण्ड सिस्टम, स्क्रीन र अर्डरअनुसारको खाना र खाजाको बारसहितको सुविधासमेत छ ।

सिनेमा हेर्न आउने दर्शकहरूलाई आफू बसेकै ठाउँमा आफ्नो इच्छाअनुसारको खाजा र खाना अर्डर गरेर खान मिल्ने गरी खाजा बार सञ्चालनमा ल्याएको बताए । 

दर्शकले बसेकै सिटबाट अर्डर गरेर खाना र खाजा खाँदै सिनेमाको मज्जा लिन पाउने सुविधा ल्याएको प्रवन्ध निर्देशक शाक्यको भनाइ छ । 

सिनेमा हेर्दै मदिरा खानेहरूको लागि छुट्टै बारको व्यवस्था रहेको हलमा बियरसहित विभिन्न मदिराहरू सेवन गर्दै सिनेमा हेर्ने समेतको सुविधा छ ।

वर्षौंदेखि सिनेजगतमा सेवा गर्दै आएको  गुण ग्रुपका प्रबन्ध निर्देशक शाक्यका अनुसार दरबारमार्गमा रहेको दरबार मलसँगै सिनेमा पारखीहरूलाई पृथक सुविधा दिन खोजिएको हो ।

अन्य हलभन्दा फरक सेवा दिने उद्देश्यका साथ सञ्चालनमा  आएको सो सिनेमा हलमा दैनिक ९ वटा शो देखाइने र टिकटको मूल्य एक हजारदेखि १२ सय रूपैयाँसम्म निर्धारण गरीएको  छ ।

गुण ग्रुपले विगत २५ वर्ष देखि ग्वार्कोमा गुण सिनेमा हल सञ्चालन गर्दै आएको छ ।