मोटरसाइकल चोरी गरेर भाग्दै गरेको अवस्थामा २ जनालाई तनहुँ प्रहरीले मंगलवार पक्राउ गरेको छ । 

शुक्लागण्डकी नगरपालिका-११ साँखे बस्ने ४३ वर्षीय भीमबहादुर थापाको घरमा पार्किङ गरी राखेको ध.१ प ५५९३ नम्बरको मोटरसाइकल चोरी गरी भाग्दै गरेको अवस्थामा उनीहरूलाई प्रहरीले पक्राउ गरेको हो । 

पक्राउ पर्नेहरूमा रुकुम पश्‍चिम आठबीसकोट नगरपालिका-३ घेत्मा घर भई हाल स्याङ्जा हरिनास गाउँपालिका चिसापानीस्थित सडक निर्माण गर्ने क्याम्पमा बस्ने २० वर्षीय नाईजेल ठकुरी र सोही ठाउँका १९ वर्षीय खीममान पुन रहेका छन् । 

उक्त मोटरसाइकल चोरी गरी भाग्दै गरेको अवस्थामा इलाका प्रहरी कार्यालय बेलचौतारा तनहुँबाट खटिएको प्रहरीले स्थानीयको सहयोगमा शुक्लागण्डकी नगरपालिका-८ स्थित पुलचोकबाट उनीहरूलाई मोटरसाइकलसहित पक्राउ गरेको हो । 

उनीहरूमाथि तनहुँ जिल्ला अदालतबाट ७ दिन म्याद थप अनुमति लिई यस सम्बन्धमा आवश्यक अनुसन्धान भइरहेको छ ।