नेत्रविक्रम चन्द विप्लव नेतृत्वको नेकपा विभाजित भएर नयाँ पार्टी जन्मिएको छ ।  नेता धर्मेन्द्र बास्तोलाको नेतृत्वमा नेकपा बहुमत पार्टी गठन भएको एक नेताले जानकारी दिए । ती नेताका अनुसार बास्तोलाको नेतृत्वमा ८१ जनाको महाधिवेशन आयोजक समिति गठन भएको छ ।

चितवनमा भएको पार्टीको राष्ट्रिय भेलाबाट नयाँ पार्टी गठनको निर्णयसहित आगामी फागुनमा महाधिवेशन गर्ने तय भएको ती नेताको भनाइ छ । राष्ट्रिय भेलाले एकीकृत जनक्रान्तिको कार्यदिशा खारेज गरेको छ भने वैज्ञानिक समाजवादी क्रान्ति भनेर नयाँ कार्यदिशा तय गरिएको छ ।  

नयाँ पार्टीमा विप्लव समूहबाट छुट्टिएर २५ जना भन्दा बढी केन्द्रीय सदस्य आफूहरुतिर आएको बास्तोला समूहले दाबी गरेको छ । चुनावमा भाग लिने विषयमा विप्लव र धर्मेन्द्र पक्षबीच विवाद हुँदा पार्टी विभाजनसम्मको अवस्थामा पुगेको हो ।