सरकारले आगामी आर्थिक वर्ष २०७९/८० को नीति तथा कार्यक्रम जेठ ७ गते संसदमा प्रस्तुत गर्ने भएको छ । 

संघीय संसद सचिवालयका प्रवक्ता डा. रोजनाथ पाण्डेले जेठ ७ गते संसदमा नीति तथा कार्यक्रम सार्वजनिक गर्ने कार्ययोजना बनेको बताएका हुन् । 

उनका अनुसार सरकारको नीति तथा कार्यक्रमको संशोधन र छलफल ८ देखि ११ गतेसम्म हुनेछ । 

राष्ट्रपति विद्यादेवी भण्डारीले आगामी जेठ ३ गते संसद अधिवेशन आह्वान गरेकी छन् । प्रवक्ता पाण्डेका अनुसार संवैधानिक व्यवस्थाअनुसार जेठ १५ गते बजेट ल्याउनुपर्ने भएकाले राष्ट्रपतिले संसद अधिवेशन जेठ ३ गतेलाई आह्वान गरेकी हुन् । 

‘बजेट अधिवेशनका लागि संसद सचिवालयले सुरक्षा, स्वास्थ्य मापदण्डलगायतका भौतिक तयारी पूरा गरेको छ,’ उनले भने, ‘उनले जेठ ३ गते पहिलो प्रतिनिधि सभाको बैठकमा अर्थमन्त्री जनार्दन शर्माले बजेट सिद्धान्त र प्राथमिकतासम्बन्धी प्रस्ताव पेश गर्ने कार्यक्रम छ ।’

जेठ ४ र ५ गते संसद्मा प्रि–बजेटमा छलफल हुने प्रवक्ता डा. पाण्डेले बताए । जेठ १२ वा १३ गते संसद्मा आर्थिक सर्वेक्षणसम्बन्धी प्रस्ताव अर्थमन्त्री जनार्दन शर्माले पेश गर्ने र संवैधानिक प्रावधानअनुसार जेठ १५ गते बजेट भाषण गर्ने तयारी रहेको उनले जानकारी दिए । 

प्रवक्ता पाण्डेले जेठ १५ गतेपछि जेठ महिनाभर आर्थिक विधेयक तथा अन्य कार्यक्रमहरू निरन्तर रुपमा चल्ने बताए । उनका अनुसार प्रतिनिधि सभासँगै ३ गतेबाट राष्ट्रिय सभाको बैठक पनि शुरू हुनेछ । 

एमालेले माधव नेपाललगायत १४ सांसदविरुद्ध कारबाहीको माग गर्दै गत भदौदेखि नै संसद अवरुद्ध गर्दै आएको छ ।