हिन्दी भाषामा बन्ने हरर फिल्महरूले चिकित्साविज्ञानको कुरा नगरेकै राम्रो । 

प्रियदर्शनले बनाएको भूल भुलैया मलयाली भाषाको मणिचित्रथाजुको रिमेक थियो । त्यसमा मञ्जुलिका नाम गरेकी भूतनीको कथा चलुन्जेल दर्शकको ध्यान तानिन्थ्यो । तर उनको यो व्यवहारलाई मनोवैज्ञानिक समस्या भनी चिनाएपछि सबै कुरा बिग्रँदै गयो । 

भूल भुलैया २ चाहिँ तार्किकता नभएको तर्साउने फिल्म हो । निर्देशक अनीश बाजमीको यो फिल्म स्मार्ट छैन तर फिल्म अर्थहीन भएकैले रमाइलो छ । 

विवाह गर्न लागेकी युवती रीत (कियारा आडवाणी) मनालीमा छुट्टी बिताइरहेकी छन् । उनले बिहे गर्न लागेको युवक र उनकी बहिनीबीच प्रेमसम्बन्ध छ भन्ने कुरा थाहा पाएपछि उनी आफू दुर्घटनामा मारिएको भान परिवारलाई दिलाउँछिन् । 

मनालीका हिउँ भरिएका पहाडमा रीत रुहान (कार्तिक आर्यन) सँग ठोक्किन पुग्छिन् । उनीहरू नजिकिन थाल्छन् र रूहानले रीतलाई झूटो मृत्युको कथा बुन्न सघाउँछन् । उनी रूह बाबा बनेर रीतको भूतसँग कुराकानी गरिरहेको अभिनय गर्छन् । तर रीतको परिवारमा भूतको छायाँ परेको कुरा बिचरा रूहानलाई के थाहा !

रीत र रूहानको भेट हुनुअघि मञ्जुलिका नामक भूतनीलाई देखाइन्छ । आँखामा बेस्सरी गाजल दलेकी अनि जगल्टा फिँजाएकी मञ्जुलिकाले मानिसहरूलाई भुइँमा लतारेको र उनलाई समातेर सदाका लागि एक ठाउँमा थुनिएको देखाइन्छ । 

कुनै मूर्खले ढोका खोलेर मञ्जुलिकालाई बाहिर निकालेको अनि उनले हंगामा मच्चाएको कुरा त भनिरहनै पर्दैन । तर पटकथाकार आकाश कौशिकले मञ्जुलिका पात्रलाई रहस्यमय बनाउनका लागि अनेकौं पात्रको भूल भुलैया खडा गरेका छन् । 

त्यसो गर्दा पनि मञ्जुलिकाको रहस्य एकैछिनमा खुलिहाल्छ । तैपनि उनलाई देख्दा दर्शकहरू एकपटक तर्सिन्छन् । मञ्जुलिकाको मेकअपका लागि निकै मेहनत गरिएको छ । 

दर्शकलाई तर्साउनका लागि अनेकौं दृश्य निर्माण गरिएको छ । कालो लुगा लगाएकी अनि अनुहारमा रंग पोतेर भूतनी देखिएकी पात्र, सुनसान विशाल हवेली, निकै तर्सिएको संयुक्त परिवार, सबैको केही न केही कालो रहस्य अनि धोका– यी सबैले दर्शकलाई तर्साउँछन् अनि कतैकतै हसाउँछन् पनि । 

भूल भुलैया २ को स्क्रिप्टमा कुनै तार्किकता भेटिँदैन तर यो रद्दी नै हो भन्न पनि मिल्दैन । यसमा थुप्रै वान लाइन टुक्काहरू छन् । अनि यसको ह्युमर रमाइलो किसिमको छ । 

सञ्जय मिश्रा धामीझाँक्री र अश्विनी कलसेकर उनकी हल्लाखोर पत्नीको भूमिकामा छन् । रूह बाबाको लोकप्रियता बढ्दै गएपछि उनीहरूको रोजीरोटीमा असर परेको दृश्य रमाइलो छ । राजपाल यादवको मूर्ख हर्कत रमाइलो छ भने राजेश शर्माका रमाइला फन्डा पनि हेर्न मजै आउँछ । 

कियारा आडवाणीको भूमिका खासै दमदार छैन तर उनले मञ्जुलिकाको भयानक नृत्य गरेको प्रशंसायोग्य छ । 

कार्तिक आर्यनले रमाइला लाइनहरू बोल्न पाएका छन् । अन्धविश्वास, लोकप्रिय संस्कृति र भूतप्रेतका कुरालाई मजाकमा उडाउने क्रममा उनले सफलता पाएका छन् । 

तब्बुको अभिनयमा खोट लगाउने ठाउँ छैन । उनले फिल्ममा आफ्नो भूमिकालाई रमाइलो गरी निर्वाह गरेकी छन् । 

रिडिफ डट्कममा प्रकाशित सुकन्या वर्माको समीक्षा

फिल्म भूल भुलैया २

कलाकार कार्तिक आर्यन, कियारा आडवाणी, तब्बु, सञ्जय मिश्रा, राजपाल यादव

निर्देशक अनीश बज्मी

विधा हरर कमेडी

अवधि २ घन्टा ३९ मिनेट

रेटिङ ५ मा साढे २ तारा