एसपीपीमा प्रस्ताव पठाउँदा सुशील कोइराला र देउवा प्रधानमन्त्री थिए : ईश्वर पोखरेल

नेकपा एमालेका वरिष्ठ उपाध्यक्ष ईश्वर पोखरेलले अमेरिकी सैन्य सम्झौता स्टेट पार्टनशिप प्रोग्राम (एसपीपी) को लागि पत्र पठाउँदा नेपालमा सुशील कोइराला र शेरबहादुर देउवा प्रधानमन्त्री रहेका बताएका छन् । 

बिहीवार बसेको प्रतिनिधिसभा बैठकको शुरूमै सभामुखसँग समय लिएर पोखरेलले सत्तापक्षले एमालेप्रति दोषारोपण गरेको आरोप लगाए ।
 
‘सन् २०१५ र २०१७ मा प्रस्ताव पठाइएको थियो । त्यो बेला कसको नेतृत्वमा सरकार थियो, त्यो प्रधानमन्त्री को थियो ? गठबन्धनका नेताहरू झूट कुरा बोलिरहनुभएको छ,’ पोखरेलले भने, ‘२०१५ मा सुशील कोइराला हुनुहुन्थ्यो, २०१७ मा प्रधानमन्त्री देउवा हुनुहुन्थ्यो ।’

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले केपी ओलीको पालामा एसपीपीको सम्झौता भएको भनेर झूट कुरा गरेको भन्दै आपत्ति जनाए । ‘केपी ओलीको पालामा भएको भनेर जसरी स्थापित गर्न खोजिएको छ, यसमा खेद व्यक्त गर्दछु । गठबन्धनका एक नेताले आरोप लगाएको जस्तो भए प्रमाण प्रस्तुत गर्नुस्, होइन भने गैरजिम्मेवार बोलेकोमा क्षमा माग्नुपर्छ,’ पोखरेलले भने ।

प्रचण्डले बिहीवार एक कार्यक्रममा ओलीले सो सम्झौता गरेको आरोप लगाएका थिए ।