संसद्को रोचक दृश्य- सभामुखले कांग्रेसका मन्त्रीलाई झपारे, एमाले सांसदले टेबल ठोके

प्रतिनिधि सभा बैठकमा लोसपाका एक सांसद बोलिरहेको समयमा संसद प्रवेश गरेका मन्त्रीलाई सभामुख अग्नि सापकोटाले झपारेका छन् । 

शुक्रवार लोसपा सांसद एकवाल मिया बोलिरहेको समयमा कांग्रेस सांसदसमेत रहेका खानेपानी मन्त्री उमाकान्त चौधरी संसद् बैठक प्रवेश गरेका थिए । 

सांसद बोलिरहेको समयमा सभामुखले एक्कासि ‘माननीय रोकिनुस्’ भनेपछि एकवाल मिया बोल्दाबोल्दै रोकिएका थिए । ‘माननीय मन्त्री रोकिनुस्, घुमेर आउनुस्,’ सभामुखको निर्देशनपछि मन्त्रीहरू बस्ने कुर्सीमा पुगिसकेका मन्त्री चौधरी फर्केका थिए । 

प्रतिनिधि सभा नियमावलीमा कुनै सदस्यले बोलिरहेको समयमा सभामुख र सदस्यको बीचबाट बाटो काट्न नपाइने व्यवस्था छ । यस्तै सभामुखलाई पिठ्यूँ देखाएर हिँड्न नपाइने व्यवस्था छ । 

त्यसपछि मन्त्री चौधरी घुमेर सभामुखको बायाँतर्फको ढोकाबाट संसद बैठकमा प्रवेश गरेका थिए । कांग्रेस मन्त्रीलाई रुलिङ गरेपछि एमाले सांसदहरूले टेबल ठटाएर समर्थन गरेका थिए । एमाले संसदीय दलका उपनेता समेत रहेका पूर्व सभामुख सुवास नेम्वाङले समेत टेबल ठटाएका थिए । 

सभामुख सापकोटाको कार्यशैलीको विरोध गरेको एमालेका सांसदले सापकोटाको समर्थनमा पहिलो पटक टेबल ठटाएका हुन् ।