प्रमुख प्रतिपक्षी दल नेकपा एमालेका अध्यक्ष एवं पूर्वप्रधानमन्त्री केपी ओलीले अमेरिकी सैन्य सम्झौता राज्य साझेदारी कार्यक्रम (एसपीपी) अगाडि बढाउन आफूले निर्देशन दिएको भए संसदमा प्रमाण ल्याउन चुनौती दिएका छन्। एसपीपीलाई पत्राचार गर्ने तत्कालीन प्रधानसेनापतिलाई सम्पर्क गर्न सकिने उनको भनाइ छ। 

सोमवार बसेको प्रतिनिधि सभा बैठकमा सभामुखसँग समय लिएर प्रतिपक्षी दलका नेता ओलीले कुन–कुन प्रधानमन्त्री र रक्षामन्त्रीले निर्णय गरेर एसपीपीमा पत्राचार भएको भन्ने सत्य तथ्य बाहिर ल्याउन माग गरेका हुन्। 

‘तत्कालीन प्रधानमन्त्री र प्रधानसेनापतिको हैसियतमा मैले कुनै निर्देशन दिएको सबुत भए पेश गर्नु’ संसदमा ओलीले भने, ‘यसको वास्तविकता प्रधानमन्त्रीले बाहिर ल्याउनु पर्छ।’ ओलीले सम्बोधन गर्दा प्रधानमन्त्री शेरबहादुर देउवा संसदमा उपस्थित थिए।  

ओलीले एसपीपीजस्तो विषय धेरै गिजोलिएकोले आफूले संसदमा बोल्नु परेको बताए। ओली पहिलोपटक प्रधानमन्त्री बनेको केही दिनमा तत्कालीन प्रधानसेनापति राजेन्द्र क्षेत्रीले एसपीपीमा सहभागी हुन अमेरिकालाई पत्राचार गरेका थिए। 

सन् २०१५ मा आफू प्रधानमन्त्री नहुँदै सरकारले एसपीपीबारे पत्राचार शुरु गरेको ओलीले दाबी गरे। आफू प्रधानमन्त्री भएपछि गरिएको पत्रचारबारे सेनाले जानकारी नगराएको उनले बताए।