क्यानडाले सेनाको औपचारिक वस्त्रको नियममा परिवर्तन गरेको छ । 

नयाँ नियमअनुसार अब पुरुष सैनिकहरूले लामो नङ पाल्न, अनुहारमा ट्याटू हान्न, कपाल रंगाउन र स्कर्ट लगाउन पाउनेछन् ।

मंगलवार क्यानडाको सेनाले सार्वजनिक गरेको दस्तावेजमा उल्लेख गरिएअनुसार, औपचारिक वस्त्रमा परिवर्तन गर्न ढिलाइ भइसकेको थियो । तर यो परिवर्तन हचुवाका भरमा नगरिएको उसको भनाइ छ । समाजमा आएको परिवर्तनअनुरूप सेनाले परिवर्तन गरेको बताइएको छ ।

सेप्टेम्बर महिनादेखि लागू गरिने नयाँ नियमले समावेशिता र लैंगिक तटस्थतालाई ध्यान दिएको सेनाको भनाइ छ । 

अब युनिफर्महरूलाई पुरुष र महिला वर्गमा बाँडिने छैन । यसको अर्थ हुन्छ, पुरुष सैनिकले पनि स्कर्ट लगाउन पाउनेछन् ।

आधारभूत तालिममा सैनिकहरूले कपाल मुण्ड्याउनुपर्ने आवश्यकता पनि नयाँ नियमले हटाएको छ । काममा अवरोध नहुने गरी पुरुष सैनिकहरूले कपाल रंगाउन, नङ पाल्न र कान छेड्न पाउनेछन् ।