अवैध रूपमा सञ्चालित कल सेन्टरको अनुसन्धानका लागि केन्द्रीय अनुसन्धान गर्न ब्यूरो (सीआईबी) को टोली रूपन्देही आइपुगेको छ ।

तिलोत्तमास्थित ब्लू स्काई सोलुसन प्रालि नाम दिइएको कल सेन्टरमा रूपन्देही प्रहरीले गत आइतवार छापा हानेर त्यहाँ भइरहेका गतिविधिलाई नियन्त्रणमा लिएको थियो । 

सूचना प्रविधिसम्बन्धी विज्ञ प्रहरी अधिकृत सहितको २ जनाको टोलीले मंगलवारबाट अनुसन्धान थालेको छ । कल सेन्टरले भारतीय नागरिकलाई बैंकिङ ऋण प्रवाहका नाममा ठगी गर्ने गरेको प्रहरीले बताएको छ ।

मंगलवारदेखि सीआईबीको टोलीले बरामद गरिएका कम्प्युटर, ल्यापटप र कल सेन्टरमा ऋण प्रवाहका लागि प्रयोग गरिएका एप्सहरूबारे अनुसन्धान थालेको रुपन्देही प्रहरी प्रमुख रवीन्द्र रेग्मीले जानकारी दिए । 

साइबर सम्बन्धी जनशक्ति नहुँदा जिल्ला प्रहरी कार्यालय रुपन्देहीले अनुसन्धानका लागि सीआईबीबाट टोली मगाएको थियो । ठगी कसूरमा मुख्य अभियुक्तका रूपमा भारतको बिहारका २५ वर्षीय जिसाद दबङ भन्ने निरञ्जन कुमार र दाङको घोराही उपमहानगरपालिका–१३ का ४० वर्षीय हिमाल बाठामगरलाई पक्राउ गरेर थप अनुसन्धान अघि बढाएको डीएसपी केसीले बताए । 

बैंकिङ एप्समार्फत ऋणको प्रलोभनमा पारेर सर्वसाधारणलाई पीडित बनाएको आरोप लगाइएको छ । तिलोत्तमा–२ जानकीनगर रुरुपथस्थित प्रेमराज गुरुङको घरमा कल सेन्टरले मासिक ३ लाख २५ हजार रुपैयाँ तिरेर घर भाडामा लिएको थियो । तिलोत्तमा र काठमाडौंको कल सेन्टरबीच सम्बन्ध रहेको हुनसक्ने प्रहरीले अनुमान गरेको छ । 

बुटवल आएको सीआईबीले काठमाडौंसहित देशका मुख्य शहरमा पनि कल सेन्टर सञ्चालन भएको हुनसक्ने आशंकासहित अनुसन्धान अघि बढाएको बताएको छ । आइतवार प्रहरीले त्यहाँ काम गर्ने १५० जना किशोरकिशोरीलाई पक्राउ गरेको थियो ।