हरिवंश आचार्यको मुख्य भूमिका रहेको चलचित्र ‘महापुरुष’को फस्टलूक पोस्टर सार्वजनिक गरिएको छ ।

‘जात्रा’ फ्रेम्ड निर्देशक प्रदीप भट्टराईको लेखन तथा निर्देशन रहेको चलचित्रको २ वटा पोस्टर सार्वजनिक भएको हो ।

एउटा पोस्टरमा अभिनेता हरिवंशलाई मात्रै फिचर्ड गरिएको छ । उनी पिंजडामाथि बसिरहेको सुगालाई नियालिरहेका देखिन्छन् । पोस्टरमा उनको लुक्स नौलो लाग्छ ।

दोस्रो पोस्टरमा हरिवंश र अभिनेत्री गौरी मल्ललाई चित्रण गरिएको छ । पोस्टरमा उनीहरू दुलाहा–दुलहीको भेषमा भाग्दै गरेको देखिन्छन् । फस्टलूक सार्वजनिकसँगै चलचित्रको प्रदर्शन मिति समेत तय गरिएको छ ।

चलचित्र कात्तिक ११ गतेदेखि प्रदर्शनमा आउने भएको छ । सामाजिक विषयवस्तुमा निर्माण गरिएको ‘महापुरुष’ प्रदीप निर्देशित चौथो चलचित्र हो । 

षट्कोण आर्टस्को प्रस्तुती रहेको ‘महापुरुष’मा हरिवंश र गौरीसँगै मदनकृष्ण श्रेष्ठ, रबिन्द्र सिंह बानियाँ, राजाराम पौडेल, अरुण क्षेत्री, अञ्जना बराईली लगायतको अभिनय छ । म्याक्स दिपेश खत्री निर्माता रहेको चलचित्रको कार्यकारी निर्माता रविन्द्रसिंह बानियाँ हुन् । दीपक बज्राचार्यको छायांकन रहेको चलचित्रलाई मित्र डी गुरुङले सम्पादन गर्नेछन् ।