राष्ट्रियसभा सदस्य दुर्गाकुमारी गुरुङले खेलाडीहरूलाई पनि पेन्सन दिने व्यवस्था मिलाउन गर्न सरकारसँग माग गरेकी छन् । नेपाली कांग्रेसकी सांसद गुरुङले सोमवार राष्ट्रिय सभाको बैठकमा बोल्दै उमेर हदको व्यवस्था गरी राष्ट्रिय तथा अन्तर्राष्ट्रिय क्षेत्रमा सम्मान पाएका खेलाडीहरूलाई पेन्सन दिने व्यवस्था गर्न माग गरिन् । 

शिक्षक, कर्मचारीहरूलाई जस्तै खेलाडीलाई पनि पेन्सन दिने व्यवस्था गर्न उनको माग छ । उनले सबै उमेर समूहका नागरिकलाई खेल खेल्ने व्यवस्था मिलाउन सरकारको गम्भीर ध्यानाकर्षण गराइन् । खेलकुद क्षेत्रको विकासले मुलुकको विकास र समृद्धि हुने तथा नागरिकहरू पनि स्वस्थ हुने भएकाले त्यस क्षेत्रको विकासमा सरकारले विशेष ध्यान दिनुपर्ने उनको भनाइ थियो । 

सांसद गुरुङले युवाहरूलाई सही बाटोमा ल्याउन खेलकुद क्षेत्रमा उनीहरूको सहभागिता गराउन सरकारले ध्यान दिनुपर्ने आवश्यक्ता औंल्याइन् । उनले भनिन्, ‘खेल मैदानहरू र खेलका साधनहरू व्यापक बनाउनु पर्दछ । खेलाडीहरूको सम्मान गरी उनीहरूको हौसला बढाउनुपर्दछ । सबै उमेर र समूहको आधारमा विभिन्नस्तरमा खेलकुदको प्रतियोगिताको आयोजना गरिनुपर्दछ । खेलाडीहरूलाई पेन्सन दिने व्यवस्था गर्न म सरकारको गम्भिर ध्यानकर्षण गर्दछु ।’

सांसद गुरुङले युवाहरूलाई परिचालन गरी देशको विकास गर्नुपर्ने आवश्यक्ता भए पनि सरकारले सोहीअनुसारको नीति, कार्यक्रम र बजेट ल्याउन नसकेको गुनासो समेत गरिन् ।