नेकपा (एमाले) की सांसद दिलकुमारी रावल थापा 'पार्वती'ले निर्वाचनसम्बन्धी कानून संशोधन गर्न माग गरेकी छन् ।

सोमवार राष्ट्रिय सभा बैठकको विशेष समयमा बोल्दै सांसद रावलले वर्तमान निर्वाचन प्रणालीमा सुधार गर्न आवश्यक रहेको बताएकी हुन् ।

उनले गणतन्त्र र संघीयतालाई बलियो बनाउनका लागि निर्वाचन प्रणालीमा सुधार गर्नुपर्नेमा जोड दिइन् ।

निर्वाचन प्रणाली महंगो भएकाले स्वच्छ, निष्पक्ष र सरल ढंगले निर्वाचन सम्पन्न हुनेगरी कानूनलाई संशोधन गर्नुपर्ने उनको भनाइ छ ।

सांसद थापाले संसद् जारी रहेको उल्लेख गर्दै चालू संसदबाटै फास्ट ट्र्याकमा कानून संशोधन गर्न सरकार र राजनीतिक दलहरूको ध्यानाकर्षण समेत गराइन् ।

‘गणतन्त्रलाई बलियो बनाउनका लागि निर्वाचन प्रणालीमा गर्नुपर्ने सुधारका लागि किन दलहरू गम्भीर बन्न सकिरहेका छैनन् । संघर्षबाट प्राप्त संघीय लोकतान्त्रिक गणतन्त्र र संघीयतालाई संस्थागत गर्न, बलियो बनाउनको लागि वर्तमान निर्वाचन प्रणालीमा सुधार गर्न जरुरी छ,' उनले भनिन्, 'निर्वाचनको मिति घोषणा भइसकेको छ । संघीय संसद् चालू रहेको अवस्था छ । अरु विषयमा फास्ट ट्रयाकबाट थुप्रै विधेयक पास गरिरहेका छौँ । निर्वाचनसम्बन्धी कानून पनि हामीले परिवर्तन गर्नु जरुरी छ ।'

उनले निर्वाचनमा विद्युतीय मतदान प्रणाली लागू गर्न निर्वाचन आयोगलाई आग्रह गरिन् ।

साथै भयरहित रूपमा निर्वाचन सम्पन्न गर्ने प्रबन्ध मिलाउन पनि उनको आग्रह छ ।

सांसद रावलले भारतबाट इन्धनको मूल्य घटेर आएको भन्दै नेपालमा पनि मूल्य घटाउन समेत सरकारको ध्यानाकर्षण गराइन् ।