लुम्बिनी प्रदेशसभाको  सार्वजनिक लेखा समितिले प्रदेश पूर्वाधार विकास प्राधिकरणका कार्यकारी प्रमुख छविराज पोखरेललाई लुम्बिनी प्रादेशिक अस्पतालको भवन निर्माणको ठेक्का प्रक्रियाका सम्पूर्ण कागजात लिएर उपस्थित हुन निर्देशन दिएको छ ।

लुम्बिनी प्रादेशिक अस्पतालको नयाँ भवन निर्माणको ठेक्का प्रक्रियामै करोडौंको आर्थिक चलखेल गरि  निश्चित कम्पनीलाई मात्रै ठेक्का प्रक्रियामा सहभागी  मिल्ने गरि टेण्डर आव्हान गरिएकोले ठेक्का रोक्न अदालतमा रिट समेत दायर भएका बेला सार्वजनिक लेखा समितिले उक्त निर्देशन दिएको हो ।

समितिको बुधवार बसेको बैठकले एकसाता भित्र ठेक्का प्रक्रियाका सम्पूर्ण कागजात सहित प्रदेश पूर्वाधार विकास प्राधिकरणका कार्यकारी प्रमुख छविराज पोखरेल आफै उपस्थित हुन निर्देशन दिएको समितिका सभापती विष्णु पन्थीले बताए । 

यसैबीच समितीले बैंक तथा बित्तिय संस्थाहरुलाई उद्यम गर्न सर्वसाधारणलाई बिना झण्झट ऋण प्रवाहको व्यवस्था मिलाउन आग्रह गरेको छ । 

बैंक तथा वित्तीय संस्थाहरुका लुम्विनी प्रदेश स्तरीय कार्यालयका प्रमुखहरुसँगको छलफलमा  सभापति पन्थीले बैंकहरुले एक बर्षसम्म बिना निर्णय फाईल अड्काउने गरेको गुनासो आएको बताए  । 

बैंकहरुले सामान्य फाईल पनि एकबर्ष सम्म रोकेर राख्ने गरेको गुनासो आएको भन्दै पन्थीले महिनौसम्म फाईल रोकेर राख्दा उद्यम गर्न चाहनेहरुमा निराशा छाएको बताए ।  

 नेपाल राष्ट्र बैंक भैरहवाकी निर्देशक रन्जना पौडेलले राष्ट्र बैंकले सर्वसाधारणले जम्मा गरेको रकम जोखिम हुन नदिन नीतिगत कडाई गरेको भएपनि सहलियतपुर्ण कर्जामा लक्षित बर्गमा हुने ऋण प्रवाहलाई भने सहज बनाउन निर्देशन दिएको बताइन्  ।