काठमाडौं महानगरपालिकाका मेयर बालेन शाह यतिबेला अतिक्रमित संरचना हटाउने कार्यमा सक्रिय छन् । स्वतन्त्र उम्मेदवार बनेर नेतृत्वमा पुगेपछि उनले महानगर क्षेत्रका अतिक्रमित संरचना हटाउने अभियानलाई तिव्रता दिएका हुन् । 

कैयन अवैध संरचनामा डोजर चलाइसकेका शाह पछिल्लो समय टुकुचाको खोजीमा लागेका छन् । उनले टुकुचालाई पुरानो स्वरुपमा फर्काउने उद्घोष गरेर दुई दिनअघि हात्तीसारस्थित जय नेपाल हल परिसरमा उत्खनन् गर्न लगाएका थिए । सो क्रममा दबिएको अवस्थामा टुकुचाको प्रवाह भेटिएपछि यसबारे बहस चर्किएको छ ।  हात्तीसार क्षेत्रको टुकुचा राणाकालमै भूमिगत बनाइएको र अहिले उत्खनन् गर्नुको अर्थ नहुने एक थरीको भनाइ छ भने अर्कोथरीले टुकुचालाई पुरानो स्वरुपमा फर्काउने शाहको अभियान सही भएको बताउँदै आएका छन् । 

यहीबीचमा शाहले लामो समयसम्म समाधान हुन नसकेको तीनकुनेको जग्गाको विषयमा चासो दिएका छन् । २०३१ सालमा तत्कालीन पञ्चायत सरकारले स्मारक बनाउन भन्दै तीनकुनेको जग्गा अधिग्रहण गरेको थियो। तर थोरै मुआब्जा दिएको भन्दै स्थानीयले विवाद निकाल्दै आएकामा सो विवाद हालसम्म पनि समाधान हुन सकेको छैन । 

तीनकुने भएकै निर्वाचन क्षेत्रबाट विगतमा राष्ट्रपति विद्यादेवी भण्डारी र नेकपा एकीकृत समाजवादी पार्टीका अध्यक्ष माधव नेपाल निर्वाचित भएको भएपनि उनीहरुले समस्या समाधान गर्न चासो नदिएको भन्दै शाह खनिएका छन् । शनिबार उनले अबको चुनावमा कुन मुख लिएर चुनावमा जानुहुन्छ भन्दै कटाक्ष समेत गरेका छन् । 

 आफ्नै क्षेत्र तीनकुनेको ५० वर्षदेखिको समस्या आफैले हस्ताक्षर गरेर बारम्बार सम्झौता गरेर पनि समाधान नगरेको बालेनको आरोप छ । उनले सामाजिक सञ्जालमार्फत भनेका छन्, ‘आदरणीय माधव नेपालज्यू तथा सम्माननीय राष्ट्रपतिज्यू,  प्रधानमन्त्री बन्नु भयो, राष्ट्रपति बन्नु भयो । आफ्नै क्षेत्र तीनकुनेको ५० वर्षदेखिको समस्या आफैले हस्ताक्षर गरेर बारम्बार सम्झौता गरेर पनि समाधान गर्नु भएन । अब कुन मुख देखाएर जनता माझ भोट माग्न जानु हुन्छ ?’

उनले चुनाव आउन अझै दुई महिना रहेको र सरकार माधव नेपालहरुकै रहेकाले समस्या समाधान गर्न आग्रह गरेका छन् ।