काेराेना महामारीपछि नेपालमै पहिलोपटक नाडा इभी एक्स्पो २०२२ शुरू भएको छ । नाडा अटोमोबाइल्स डिलर एसोसियसन नेपालको आयोजनामा काठमाडौंको भृकुटीमण्डपमा एक्स्पो बिहीवारदेखि शुरू भएको हो । अर्थमन्त्री जनार्दन शर्माले रिबन काटेर एक्स्पोको उद्घाटन गरे । कोरोना महामारी र सरकारी नीतिले सुस्ताउन पुगेको अटोमोबाइल व्यवसायलाई यस मेलाले ’पुनर्जीवन’ दिने नाडाले जनाएको छ ।
कोरोना महामारीपछि यो पहिलो एक्स्पो हो । 

नाडाका अध्यक्ष ध्रुव थापाले नेपालमा पहिलोपटक नाडा एक्स्पो शुरू भएको बताए । उनले विद्युतीय सवारी साधनको आवश्यकतालाई औँल्याएर एक्स्पो आयोजना गरिएको जानकारी दिए । सन् १९९८ देखि नै नाडाले एक्स्पो आयोजना गरेको थियो । 

सरकारले विदेशी मुद्रा सञ्चितिमा दबाब देखाउँदै निजी सवारी साधनमा प्रतिबन्ध लगाउँदा करिब २५ प्रतिशत व्यावसायी पलायन भएको अध्यक्ष थापाले बताए । उनले सो सवारीसाधनको आयात खुलाउन सहजीकरण गरिदिन अर्थमन्त्री शर्मालाई आग्रह गरे ।

उनले भने, ‘आयात बराबरको राजश्व तिर्ने अटोमोबाइल क्षेत्रमा पनि निजी प्रयोजन गरिने जीप, भ्यान र कारमा लगाइएको प्रतिबन्ध खुलाउन पहल गर्नुहुन अनुरोध गर्छु ।’ उनले बजेटमा अन्तर्राष्ट्रिय सम्मेलन केन्द्र समेटिएको भन्दै त्यसलाई अगाडि बढाउन आग्रह गरेका छन् ।

नेपालका लागि ईभी नयाँ भएको र धेरै चुनौती सामना गर्दै अगाडि आइपुगेको एक्स्पो संयोजक अनुप बरालले जानकारी दिए । वर्तमान समयमा विद्युतीय सवारीसाधनको महत्व बढ्दै गएको र नेपालमा पनि यसले बजार विस्तार गर्दै गएको उनले सुनाए ।

एक्स्पोमा ५१ वटाको स्टल राखिएको छ ।