सुनसरी १ मा नेकपा एमाले मनोज मेयाङ्बोले बागी उम्मेदवारी दर्ता गराएका छन् । उनले प्रतिनिधि सभातर्फ स्वतन्त्र उम्मेदवारी दर्ता गराएका हुन् । 

सुनसरी १ एमालेले जनता समाजवादी पार्टी (जसपा)लाई समर्थन गर्ने दुई पार्टीबीच सहमति भएको थियो । एमाले–जसपाका तर्फबाट सह–अध्यक्ष अशोककुमार राईले टिकट पाएका छन् । 

मेयाङ्बोले पार्टीको तर्फबाट उक्त क्षेत्रमा टिकट दाबी गरेका थिए । तर, पार्टीले जसपालाई समर्थन गर्ने निर्णय गरेपछि उनले बागी उम्मेदवारी दर्ता गराएका हुन् । उनले आइतवार दिउँसो मुख्य निर्वाचन अधिकृतको कार्यालयमा पुगेर उम्मेदवारी दर्ता गराएका थिए । उम्मेदवारी दर्ता गराउने क्रममा उनीसँगै स्वतन्त्र उम्मेदवारी दिएर गत स्थानीय तहको निर्वाचनमा धरानको मेयर पदमा विजयी भएका हर्क साम्पाङ पनि देखिएका थिए । 

एमाले र जसपाबीच तालमेल हुने भनिएको मोरङ ५ मा पनि एमालेका योगेन्द्र मण्डलले बागी उम्मेदवारी दिएका छन् । जसपा र एमालेबीच मोरङ ५ र सुनसरी १ मा एमालेले जसपालाई समर्थन गर्ने सहमति भएको थियो ।