‘पोइ पर्‍यो बुढो’ नामक फिल्म निर्माण हुने भएको छ । २०७६ सालमा प्रदर्शनमा आएको शिशिर राणा निर्देशित फिल्म ‘पोइ पर्‍यो काले’को नेम सिक्वेलका रूपमा ‘पोइ पर्‍यो बुढो’ निर्माण हुन लागेको हो । प्रदर्शनरत फिल्म ‘दुई नम्बरी’का निर्देशक दीपेन्द्र लामा र निर्माता किरण नेपालीबीच यस फिल्ममा सहकार्य हुने भएको छ । ‘पोइ पर्‍यो काले’का निर्माताले ‘दुई नम्बरी’का निर्देशकलाई लिएर ‘पोइ पर्‍यो बुढो’ निर्माण गर्न लागेका हुन् । 

फिल्ममा दीपेन्द्रकै कथा रहनेछ । यतिबेला स्क्रिप्ट लेखनको काम भइरहेको र फागुनपछि छायाँकन थालिने प्रस्तुतकर्ता किरण नेपालीले जानकारी दिए । ‘पोइ प¥यो काले’मा सौगात मल्ल, पूजा शर्मा, श्रृष्टि श्रेष्ठ, आकाश श्रेष्ठको अभिनय थियो । यसको नेम सिक्वेलमा पूजा दोहोरिन सक्ने चर्चा छ । तर, किरण र दीपेन्द्रले अहिलेसम्म कुनै कलाकारसँग कुराकानी नभएको बताएका छन् । 

स्क्रिप्ट लेखन सकिएपछि मात्र कलाकार छानिने उनीहरू बताउँछन् । ‘पोइ पर्‍यो काले’ सफल भएकाले निर्माता नेपालीले यसको नेम सिक्वेल बनाउन लागेका हुन् । फिल्म आउँदो वर्ष २०८० मा प्रदर्शनमा ल्याउने गरी तयारी थालिएको बताइएको छ । 

दीपेन्द्र निर्देशित फिल्म ‘दुई नम्बरी’ले यतिबेला बक्सअफिसमा सुखद् व्यापार गरिरहेको छ । फिल्मले लगानी उठाइसकेको प्रस्तुतकर्ता किरण नेपालीको दाबी छ ।