नेपाल वायुसेवा निगमले पछिल्लो पटक ऋणको किस्तावापत ७३ करोड रुपैयाँ बुझाएको छ । २०७९ असोज ३१ गते कर्मचारी सञ्चय कोष र नागरिक लगानी कोषलाई तिर्नुपर्ने ऋण दायित्वको किस्तावापतको ७३ करोड ९ लाख ५५ हजार २८१ रुपैयाँ भुक्तानी गरेको निगमले जानकारी दिएको छ ।

कर्मचारी सञ्चय कोष र नागरिक लगानी कोषबाट जहाज खरिदका निम्ति ऋण लिएकोमा कर्मचारी सञ्चय कोषलाई न्यारोवडी जहाज खरिदको सावाँ र ब्याजवापतको ५३ करोड ९ लाख ५५ हजार २८१ रुपैयाँ बुझाएको छ ।

नागरिक लगानी कोषको हकमा भने बाइडबडी जहाज खरिद गर्दाको ऋण दायित्वको किस्तावापतको २० करोड रुपैयाँ गरी जम्मा ७३ करोड ९ लाख ५५ हजार २८१ किस्ता वापतको रकम भुक्तानी गरिएको छ । 

विगत तीन वर्षदेखि विविध कारणले संचयकोष तथा नागरिक लगानी कोषको ऋण दायित्व भुक्तानी गर्न नसक्ने अवस्था विस्तारै सुध्रदै गएको निगमको दाबी छ । निगमले नियमित उडान, अकुपेन्सी दरमा सुधारबाट आम्दानीमा वृद्धि भएपछि पछिल्लो पटक २०७९ असार ३० गते कर्मचारी सञ्चय कोष र नागरिक लगानी कोषलाई तिर्नुपर्ने ऋण दायित्वको किस्ता वापतको १ अर्ब ३५ करोड रुपैयाँ पनि भुक्तानी गरेको थियो ।