बुटवलमा विभिन्न पार्टी परित्याग गरी मंगलवार १७६ जना युवा नेता नेकपा एमालेमा प्रवेश गरेका छन् । नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा) छाडेर एमाले प्रवेश गरेका नेताहरूलाई एमाले उपाध्यक्ष तथा पूर्व अर्थमन्त्री विष्णु पौडेलले पार्टीमा स्वागत गरे । 

सो अवसरमा बोल्दै रूपन्देही क्षेत्र नम्बर २ का प्रतिनिधिसभा सदस्य पदका उम्मेदवारसमेत रहेका पौडेलले एमाले रोजेका सबै नेताहरूलाई उचित भूमिका दिइने बताए । युवाको भविष्य, राजनीति र विकास एमालेबाट मात्रै सम्भव भएको बताए । 

माओवादी नेता राजु शाही, विशाल राना, एकीकृत समाजवादी नेतृ राधादेवी अधिकारी, जसपा नेता सुनिल न्यौपाने, प्रविनकुमार काफ्लेलगायत नेताहरू एमाले प्रवेश गरेको एमाले बुटवलका युवा नेता बाबुराम पन्थीले जानकारी दिए । मंगलवार नै माओवादीका बुटवल उपमहानगर कमिटी सदस्य विष्णुसिंह ठकुरी र क्षेत्र नम्बर २ शाखा कमिटी सचिव इतेन्द्रकुमार बज्राचार्य पनि एमालेमा प्रवेश गरेका थिए ।