नेकपा एमालेका अध्यक्ष केपी शर्मा ओली अस्वस्थ भएका छन् । उनमा रुघाखोकी र ज्वरोको समस्या देखिएको हो ।  चुनावी कार्यक्रमका लागि  मंगलबार आफ्नो चुनावी क्षेत्र झापा पुगेका ओलीको स्वास्थ्यमा समस्या देखिएपछि उनी भेटघाट र अन्य कार्यक्रममा सहभागी नभएको एमाले झापाले जनाएको छ । 

ओली दमकस्थित निवासमै आराम गरेर बसेका छन् । यद्यपि ओलीले सामाजिक सञ्जालमार्फत भने सक्रियता जारी राखेका छन् । आजै सामाजिक सञ्जालमार्फत प्रधानमन्त्री तथा कांग्रेस सभापति शेरबहादुर देउवासँग ‘लाइभ डिबेट’ गर्न चाहेको बताएका थिए । 

उनले सामाजिक सञ्जालमार्फत आम नागरिकको नम्बर पनि मागेका छन् । फेसबुकको म्यासेन्जरमा नम्बर पठाउनेमध्ये सम्भव भएसम्म धेरैभन्दा धेरैलाई सम्पर्क गरेर अन्तरक्रिया गर्ने ओलीको तयारी छ । त्यसका लागि उनले कात्तिक ४ को समय छुट्याएका छन् । 

बुधबार स्वास्थ्यमा सुधार भएमा उनी पूर्वनिर्धारित कार्यक्रममा सहभागी हुनेछन् । उनी बिहीबारसम्म झापामै रहने कार्यक्रम छ ।