अघिल्लोपटक कांग्रेसको गाडीमा माओवादीले कार्यकर्ता पठाएकाले मैले हारे : बलबहादुर केसी

नेपाली कांग्रेसका केन्द्रीय सदस्य बलबहादुर केसीले आगामी चुनाव जित्नु नै आफ्ना लागि पहिलो महत्वपूर्ण कुरा भएको बताएका छन् । शनिवार काठमाडौंमा आयोजित कार्यक्रमलाई सम्बोधन गर्दै उनले काठमाडौंवासी सोलुखुम्बुका मतदाताहरूलाई चुनाव अगावै निर्वाचनमा भोट हाल्न पठाइदिन निर्देशन दिए । 

केसीले मतदातालाई जिल्ला पठाउँदा अन्य पार्टीका मानिसहरु पनि त्यही हुलमा मिसिनसक्ने भन्दै सचेत रहन आग्रह गरे । उनले नामै किटान गरेर नेकपा एमालेका कार्यकर्ताहरू पनि गठबन्धनको हुलमा मिसिएर आफूले पठाएको सवारीसाधनबाट जिल्ला जानसक्ने बताए । उनले आफू ६ पटक निर्वाचन लडिसकेको अनुभवका आधारमा विगतमा पनि यस्ता गतिविधि भएको भन्दै यसवर्ष गठबन्धन भएका कारण एउटाले अर्कालाई नचिन्ने नाममा गठबन्धनको सवारीसाधन प्रयोग गरी नेकपा एमालेका मतदाताहरू जिल्ला पुग्नसक्ने बताए । उनले २०६४ सालमा नेकपा (माओवादी केन्द्र) ले पनि कांग्रेसले पठाएको हुलमा आफ्ना कार्यकर्ता पठाएका कारण आफूले निर्वाचनमा पराजय व्यहोर्नुपरेको बताए । 

‘चुनाव जित्ने पहिलो कुरा हो । तर, मतदातालाई पठाउँदा के विचार गर्नुपर्छ भने घुसपैठ होला, सबै कांग्रेस भन्लान्, कांग्रेसले माओवादी माओवादीले कांग्रेस चिन्दैन । त्योभित्र एमालेले आफ्ना मान्छे पठाउन सक्छ । यो मेरो अनुभव छ । एक पटक कांग्रेसका पठाएको भनेको माओवादी चलाख सबै माओवादीका परेछन् । परिणाम मैले हारेँ । प्रश्न चुनाव जित्नु हो’, उनले भने । 

सोलुखुम्बु जिल्लाबाट गठबन्धनको बलमा उम्मेदवारी दिएका केसीले एमालेबाट सोलुखुम्बु जिल्लामा उम्मेदवारी दिएका नेता मानवीर राईप्रति इंगित गर्दै सिंहदरबार नै नचिनेको मानिसलाई जनताले चुन्नु नहुने बताए । उनले एमाले उम्मेदवार राईले सिंहदरबार कहाँ छ ? भनी सोध्नुपर्ने स्थिति रहेको बताए । उनले आफूलाई सिंहदरबारमा कहाँ ढुकुटी छ र कहाँ फाइल छन् भन्नेकुरा सबै थाहा भएको तर नेकपा एमालेका उम्मेदवारको केन्द्रसँग कुनै लिंक नभएको भन्दै आफूलाई जिताए जिल्लामा विकास निर्माणले गति लिने बताए । उनले बहुमतको सरकार बनाउँदा समेत नेकपा एमालेले प्रदेश १ को नामाकरण गर्न नसकेको भन्दै एमालेलाई जिताउनु नहुने बताए ।

नेता केसीले गठबन्धनले देश, जनता र संविधानलाई फाइदा हुने काम गर्ने दाबी गरे । उनले अहिलेको अवस्थाको गाउँको फोटो खिचेर राख्न र आफूले जितेको ३ वर्षपछिको परिवर्तनसँग सोलुखुम्बुको मूल्यांकन गर्न चुनौती दिए । गठबन्धनका ५ दल मिल्दा पनि नेकपा एमालेले जितेको खण्डमा गठबन्धनका कुनै दलको पनि अस्तित्व नरहने उनको भनाइ थियो ।