फिल्ममा समावेश गीत हिट हुँदा त्यसले फिल्मको ब्यापारमा फाइदा पुर्‍याएका थुप्रै उदाहरण छन् । त्यसैले पनि केही निर्माता एवं निर्देशकहरू फिल्ममा समावेश गीतलाई बलियो बनाउन निकै मेहनत गर्ने गरेका छन् । तर, गीत चल्दैमा सबै फिल्म कहाँ हिट हुन्छन् र ? असोज अन्तिम साता प्रदर्शनमा आएको ‘हिजो आजका कुरा’ हिट गीत समावेश ‘फ्लप’ फिल्म सावित भएको छ । फिल्ममा समावेश गीत ‘माया जदौ’मा निर्माण टिमले खुबै मेहनत गरेको थियो । 

रामकृष्ण ढकाल र मेलिना राईले स्वर दिएको गीतको भिडियोमा निर्माण टिमले दर्जन बढी चर्चित कलाकारहरूलाई अभिनय गराएको थियो । सन्तोष पन्तको फिल्म भएकाले पनि कलाकारहरू खुशीसाथ फिल्मको गीतमा अभिनय गरेका थिए ।

उक्त गीत निर्माण टिमको अपेक्षाभन्दा पनि धेरै हिट भयो । भिडियोको भ्युज २ करोड ६१ लाख बढी छ यतिबेला । तर, गीत खुबै हिट भएको फिल्म भने हलमा केही दिन पनि टिक्न सकेन । प्रदर्शनको एक सातामै ‘हिजो आजका कुरा’ धेरै हलबाट उत्रिसकेको छ । यसले के पुष्टि गर्छ भने गीत चल्दैमा दर्शकहरू फिल्म हेर्न हलसम्म आउँदैनन् । दर्शकलाई हलसम्म तान्न फिल्म नै राम्रो हुनुपर्छ ।