आसन्न मंसिर ४ गते हुने प्रतिनिधिसभा तथा प्रदेशसभा निर्वाचन अन्र्तगत काठमाडौंको २ नम्बर निर्वाचन क्षेत्रमा चुनावी चहलपल बढेको छ । सो क्षेत्रमा नेकपा माओवादी केन्द्रबाट पूर्व सभामुख ओनसरी घर्ती र नेकपा एमालेबाट नेता मणिराम फुयाँल चुनावी प्रतिस्पर्धामा छन् ।

घर्तीलाई सत्ता गठबन्धनमा रहेका दलहरूको समर्थन रहेको छ भने फँुयाल एक्लै चुनावी मैदानमा छन् । विक्रम संवत् २०७४ सालको निर्वाचनमा एमालेबाट उम्मेदवार बनेका माधवकुमार नेपाल विजयी भएका थिए । नेपालले १२ हजार ४६३ मतान्तरले कांग्रेसका उम्मेदवार दीपक कुइँकेललाई पराजित गर्दै २७ हजार ३६६ मत प्राप्त गरेका थिए । त्यतिबेला नेपाललाई वाम गठबन्धनको समर्थन थियो ।

गत स्थानीय तहको निर्वाचनमा ८ वडामध्ये कांग्रेसले ५, एमालेले २ र एकीकृत समाजवादीले १ वडामा जीत हासिल गरेका छन् ।

क्षेत्रमा काठमाडौं महानगरपालिका–९ र ३२ तथा कागेश्वरी मनोहरा नगरपालिका–४, ५, ६, ७, ८ र ९ वडाहरू पर्छन् । जसमध्ये कांग्रेसले काठमाडौं महानगरका ९ र सोही क्षेत्रमा पर्ने कागेश्वरी मनोहराको ५, ७, ८ र ९ वडामा विजयी भएको छ । एमाले काठमाडौं महानगरका ३२ र कागेश्वरी मनोहराको ४ नम्बर वडामा विजयी भएको छ ।

कांग्रेसका वडाध्यक्षहरूले कूल ९ हजार ५७०, एमालेले १३ हजार ८१५, एकीकृत समाजवादीले ५ हजार ८६१ र नेकपा माओवादी केन्द्रका वडाध्यक्षले ९५० मत प्राप्त गरेका छन् । 

क्षेत्रमा प्रतिनिधिसभा सदस्यका लागि राप्रपा नेपालबाट महेश बास्तोला, नेमकिपाबाट अनिल श्रेष्ठ, राष्ट्रिय प्रजातन्त्र पार्टीबाट कुन्तीदेवी पोखरेल (उपाध्याय), जनता समाजवादी पार्टी नेपालबाट गोपालबहादुर तण्डुकार, विवेकशील साझाबाट धनेज थापा, राष्ट्रिय स्वतन्त्र पार्टीबाट सोबिता गौतम, नेपाली कांग्रेस बीपीबाट हेमविक्रम सिलवाल लगायतको उम्मेदवारी छ ।

२ नम्बर क्षेत्रमा ४० मतदानस्थल र ९५ मतदान केन्द्र निर्धारण गरिएको छ । कूल मतदाताको संख्या ८१ हजार ९७० छ । जसमध्ये महिला ४० हजार ९ र पुरुष ४१ हजार ९६१ मतदाता छन् ।