अभिनेता सलोन बस्नेत अभिनित चलचित्र ‘मीलन’ प्रदर्शनको एक साता नहुँदै हलबाट उत्रिएको छ । नेपालको सबैभन्दा ठूलो मल्टिप्लेक्स चेन क्यूएफएक्सले प्रदर्शनको दिन चलचित्रलाई आफ्नो देशभरका च्यानलमा ५ शोज उपलब्ध गराएको थियो । तर, चलचित्रलाई दिएको शोमा दर्शकको उपस्थिति न्यून भएपछि क्यूएफएक्सले मंगलवार २ शो र बुधवारका लागि एक शो दिएको थियो । बिहीवारदेखि भने चलचित्र क्यूएफएक्स चेनबाट उत्रिसकेको छ ।

राजधानीमा अन्य मल्टिप्लेक्सहरूले पनि दर्शकको खडेरीका कारण चलचित्रलाई हलबाट उतारिसकेका छन् । टेक पौरखी राईको लेखन एवं निर्देशन रहेको ‘मीलन’मा सलोनसँगै कुशल शाह ठकुरी, शिल्पा थापाको शीर्ष भूमिका छ । कात्तिक ११ गतेदेखि प्रदर्शनमा आएको ‘महापुरुष’ले भने अहिलेसम्म पनि हलमा राम्रो शोज पाइरहेको छ ।