हिमाल सागर र अनु चौधरीको स्वर रहेको ‘ए हो र माया’ बोलको गीतले सार्वजनिक भएको एक महिनामै युट्युबमा एक करोड भ्युज पायो ।  

३३ दिनमा गीत करोड क्लबमा प्रवेश गरेसँगै निर्माण टिमले शनिबार साँझ केक काटेर खुशीयाली साटेको छ ।

विमल अधिकारीको शब्द एवं संगीत, कमल सौरागको एरेन्ज रहेको गीतको भिडियोमा विमल र सनिशा भट्टराईको अभिनय एवं नृत्य छ । 

यो गीत टकटकमा समेत निकै चर्चित रहेको थियो । गीतका लगानीकर्ता समेत रहेका विमल यस गीतमा अहिलेसम्म ३७ लाख टिकटक भिडियो बनेको बताउँछन् । अहिलेसम्म अरू कुनै नेपाली गीतमा यति धेरै टकटक भिडियो नबनेको उनको दाबी छ । 

मौसम हिमालीको कोरियोग्राफी एवं निर्देशन रहेको यस गीतको भिडियोलाई राजेश घिमिरेले छायाँकन एवं विकास ज्ञवालीले सम्पादन गरेका थिए ।

करोड क्लबको खुशीयाली साट्न आयोजित कार्यक्रममा बोल्दै विमलले गीतको लगानी उठिसकेको बताए ।

ठूलो टिम लुम्बिनीमा पुगेर ३ दिन लगाएर गीतको सुटिङ गरिएको विमलले सुनाए ।

उनले गीतले एक करोड भ्युज पाउँदा आम्दानी कति भयो ? त्यो भने ठ्याक्कै खुलाउन चाहेनन् । ‘७ लाख रुपैयाँ लगानी भएको थियो । त्यो लगानी उठ्यो’ – उनले भने ।

गीतको टिकटक आम्दानी भने केही महिनापछि मात्रै आउने उनले बताए । उनले आम्दानी भन्दा पनि आफूलाई स्रोता एवं दर्शकहरुको माया ठूलो लाग्ने बताएका थिए ।

‘ए हो र माया’ सफल भएसँगै यहि टिमले ‘आहा ! माया’ बोलको गीत ल्याउने तयारी गरेको समेत विमलले जानकारी दिए ।