अभिनेता सुशील श्रेष्ठको मुख्य भूमिका रहने चलचित्र ‘द आउट ल’को शुभमुहूर्त गर्दै छायाँकन सुरु गरिएको छ ।

बिहीवार बिहान ललितपुरको बंगलामुखी मन्दिरमा पूजाआजा गर्दै चलचित्रको शुभमुहूर्त गरिएको हो । 

केही समयको वर्कशपपश्चात शुभमुहूर्त गरिएको चलचित्रको बिहीवार दिउँसोबाट नै छायाँकन सुरु गरिएको छ । 

रेट्रो गु्रपको व्यानरमा एक्सन-थ्रिलर जनरामा निर्माण हुन लागेको चलचित्रलाई बिक्की महर्जनले निर्देशन गर्नेछन् ।

चलचित्रमा सुशीलको अपोजिटमा डेब्यु गर्ल शिक्षा संग्रौलाको अभिनय रहनेछ ।

नरेश पौड्याल, सुमन भण्डारी, हेम गुरुङ, विशाल पहारी लगायतको पनि चलचित्रमा शीर्ष भूमिका रहनेछ ।

कानुन नमान्ने पात्रको कथा पेस गर्ने चलचित्र शशांक खड्का र अमित अग्रहरीको लगानीमा निर्माण हुन लागेको हो भने चलचित्रको कार्यकारी निर्मातामा विनोद कडायत छन् । 

शुभमुहूर्तपश्चात सञ्चारकर्मीसँग कुरा गर्दै अभिनेता श्रेष्ठले लामो समयपछि आफूले सोँचेको स्क्रिप्टमा अभिनय गर्न पाउँदा खुशी व्यक्त गरे । 

‘लामो समयपछि यस प्रकारको चलचित्रमा काम गर्न पाउँदा खुशी छु  । स्क्रिप्ट एकदमै राम्रो लाग्यो । आशा छ चलचित्र राम्रो हुनेछ’ – श्रेष्ठले भने ।

कोरोना महामारीपछि अभिनेता श्रेष्ठ पहिलो पटक चलचित्रमा देखिन लागेका हुन् । 

डेब्यू अभिनेत्री संग्रौलाले क्रियटिभ टिमसँग काम गर्न पाउँदा खुशी लागेको बताउँदै चलचित्र राम्रो बन्नेमा विश्वास व्यक्त गरिन् । 

‘मेरो पहिलो चलचित्र हो । यस चलचित्रबाट एकदमै धेरै आशा लिएकी छु’ उनले भनिन् । राम्रो काम गर्ने आत्मविश्वास आफूमा रहेको पनि अभिनेत्री संग्रौलाले बताइन् ।

केही महिनाको आन्तरिक तयारीपछि चलचित्र छायाँकनमा निस्किएको निर्माण पक्षले जनाएको छ ।

राजधानी भित्रै करिब ३५ दिन लगाएर चलचित्रको छायाँकन हुनेछ । २ करोड हाराहारी लगानी अनुमान गरिएको चलचित्रलाई नवीन गुरुङले खिच्नेछन् ।

आगामी दशैं आसपासमा चलचित्रलाई रिलिज गर्ने निर्माण टिमको योजना छ । चलचित्रको केही दिनअघि फस्टलुक टिजर पनि सार्वजनिक गरिएको थियो । जसलाई दर्शकहरुले एकदमै राम्रो प्रतिक्रिया दिएका छन् ।

छायाँकनमा निस्किनुअघि निर्देशक महर्जनले भने, – ‘हामीले दर्शक तथा मिडियाबाट यसअघिका कन्टेन्टबाट राम्रो प्रतिक्रिया पाएका छौं । हामी धेरै लामो समयको तयारीपछि अहिले फ्लोरमा जान लागेका हौं । पक्कै पनि प्रोजेक्ट राम्रो बन्नेछ ।’