प्रदेश १ मा सभामुखकाे निर्वाचन यही पुस २८ गते हुने भएकाे छ ।

आइतवार बसेकाे कार्यव्यवस्था समितिकाे बैठकले २८ गते सभामुख र ३० गते उपसभामुखको निर्वाचन गर्ने निर्णय गरेको एमालेका प्रमुख सचेतक रेवती रमण भण्डारीले बताए ।

उनका अनुसार भाेलि बस्ने भनिएको प्रदेशसभाको बैठक पर्सिका लागि सार्ने सहमति पनि भएको छ । पर्सि ११ बजे बैठक बस्ने प्रदेशसभा सचिव गाेपाल पराजुलीले बताए  ।

सत्ता साझेदार दलहरूबीचको सहमतिअनुसार प्रदेश १ मा मुख्यमन्त्री एमाले र सभामुख माओवादीको भागमा परेको छ ।

माओवादीले सभामुख पाउने भएपछि राजेन्द्र कार्की र बाबुराम गौतमको नाम चर्चामा रहेको छ । कार्की संखुवासभाको क्षेत्र नं. १ र गौतम ओखलढुंगाको क्षेत्र नं. २ बाट प्रत्यक्ष निर्वाचित सांसद हुन् ।

बैठकमा एमाले नेता हिक्मत कार्की, रेवतीरमण भण्डारी, कांग्रेसका दलका नेता उद्धव थापा, हिमाल कार्की, माओवादी केन्द्रका दलका नेता इन्द्रबहादुर आङ्बो, एकीकृत समाजवादीकी खिनु लङ्वा लिम्बूलगायत सहभागी थिए ।