उपप्रधानमन्त्री तथा गृहमन्त्री रवि लामिछानेको नागरिकतासम्बन्धी मुद्दामा सर्वोच्च अदालतको संवैधानिक इजलासमा बहस भइरहेको छ।

शुरूमा रिट निवेदकको तर्फबाट बहस भएको छ।

कायमुकायम प्रधानन्यायाधीश हरिकृष्ण कार्की, विश्वम्भरप्रसाद श्रेष्ठ, ईश्वर खतिवडा, डा आनन्दमोहन भट्टराई र अनिलकुमार सिन्हाको इजलास बहस भएको हो।

वरिष्ठ अधिवक्ता सुरेन्द्र भण्डारीले नागरिकताको समाप्ति राज्य वा व्यक्तिको निर्णयबाट हुने तर प्राप्तिका लागि राज्यको उपस्थिति अनिवार्य हुने रिट निवेदकका तर्फबाट बहस गरेका थिए। 

लामिछानेले अमेरिकी ग्रिनकार्ड त्यागे पनि नेपाली नागरिकता प्राप्तिको प्रक्रिया पूरा नगरेको भन्दै सर्वोच्चमा रिट परेको थियो।

लामिछानेले अमेरिकी ग्रिनकार्ड लिँदा कुनै देशको नागरिक नभएको भए पनि ग्रिनकार्ड त्यागेपछि नेपालमा नागरिकता पुनःप्राप्तिको प्रक्रिया नै नथालेको भण्डारीले बताएका छन्।

नेपाली नागरिकता पुनःप्राप्तिको प्रक्रिया पूरा नगरेकाले उनी नेपाली हुन नसक्ने उनले तर्क गरे।

भण्डारीले आफ्नो बहस नोटमा लेखेका छन्- ‘उनले नेपाली नागरिकता प्राप्त गरेका छैनन् वा एक पटक कायम नरहेको नागरिकता कायम गराउन कानुनले तोकेबमोजिम प्रक्रिया थालनी गरी सो प्रक्रिया पूरा गरी नागरिकता पुन प्राप्त गरेका छैनन् भने उनलाई नेपाली भन्न सकिन्छ, तर नेपाली नागरिक भन्न सकिन्न ।’

रिट निवेदकका तर्फबाट बहस गरेका अधिवक्ता रमण कर्ण, निकिता ढुंगाना, अमृत खरेललगायतले एउटै बहस नोट पेश गरेका छन्।