नागरिक उन्मुक्ति पार्टीका अध्यक्ष रञ्जिता श्रेष्ठ चौधरीले आफूहरूको माग सम्बोधन नभएको भन्दै सुदूरपश्चिम प्रदेश सरकारलाई समर्थन गर्न सम्भावना कमजोर रहेको बताएकी छन् ।

लोकान्तरसँग कुरा गर्दै चौधरीले रेशम चौधरीको रिहाइ सहितका आफूहरूको माग सम्बोधन गर्न सत्तापक्ष तयार नभएकाले विश्वासको मत दिने सम्भावना कम रहेको बताएकी हुन् । 

‘सत्तारुढ दल रेशम चौधरीको रिहाइ सहितका हाम्रो माग पूरा गर्न बाटोमा देखिएको छैन । हाम्रो मुख्य माग नै यहीँ हो,’ चौधरीले भनिन्, ‘यसैले हामीले अहिलेसम्म कसैलाई पनि विश्वासको मत दिने तयारी गरेका छैनौं । माग सम्बोधन नभए विश्वासको मत दिन्नौं ।’

बिहीवार विश्वासको मत लिने सम्बन्धी प्रदेश सभाको बैठक १ बजेलाई राखिएको थियो तर नागरिक उन्मुक्तिका ७ सांसद काठमाडौंमा छन् । यी सांसदले समर्थन नगरे सुदूरपश्चिममा एमाले नेतृत्वको राजेन्द्रसिंह रावल नेतृत्वको सरकार ढल्नेछ ।

५३ सदस्यीय सुदूरपश्चिम प्रदेश सभामा रावलले पुस २७ गते २९ सांसदको समर्थन पाएका थिए तर बहुमत अर्थात् आवश्यक २७ सांसदको समर्थन कायम नरहे सरकार ढल्नेछ । 

काठमाडौंमा प्रधानमन्त्री पुष्पकमल दाहाल ‘प्रचण्ड’, एमाले अध्यक्ष केपी ओली सहितले उन्मुक्तिलाई मनाएर प्रदेश सरकार बचाउने कसरत गरिरहेका छन् ।