जेल जीवन बिताएर फर्किएसँगै अभिनेता तथा मोडल पल शाह एक वर्षपछि सामाजिक सञ्जालमा फर्किएका छन् ।

उनी फागु पूर्णिमा (होली)को अवसर पारेर सोमवारदेखि सामाजिक सञ्जालमा फर्किएका हुन् । 

परिवारसँग होली मनाएको तस्वीरहरू फेसबुकमा राख्दै उनले लामो स्टाटस लेखेका छन् । उनले बितेको एक वर्षलाई सिकाइको उर्वर समयको रुपमा लिएको स्टाटसमा उल्लेख गरेका छन् ।

उनले आफ्नो मनमा कसैप्रति रिस न कुनै प्रतिशोधको भावना नरहेको बताएका छन् ।

अब आफ्नो कर्मलाई तिखार्ने र दर्शकको अपेक्षालाई पूरा गर्ने एउटै लक्ष्य आफूमा रहेको उनले बताएका छन् । 

‘बितेको एक वर्षको त्यो घटनासँग जोडिएका सम्पूर्ण व्यक्तित्वमा मेरो सदा सम्मान र सद्भाव । र, यहाँ कोही कसैको दोष नभएर समयको दोष थियो । त्यसैले मेरो अनुरोध, कसैलाई गाली–गलौच र नराम्रो ब्यबहार नगरिदिनुहोला’ उनले लेखेका छन्, ‘उहाँहरूसंग फेरी सहकार्य गर्ने वातावरण मिलोस् । त्यसैले सम्मानित अदालतको निर्णयलाई सम्मान गर्दै म फेरी पुरानै संघर्षशील दैनिकीमा फर्किएको छु ।’ 

पलले आफ्नो स्वागतमा परिवार, आफन्त, साथीभाइका साथै हजारौं दर्शकको भीड देख्दा आफू नमात्तिएको, बरु थप जिम्मेवार बनाएको महसुस गरेको बताएका छन् । गत साता जेलमुक्त पलले केही दिनमै अभिनयमा फर्किने तयारी गरेका छन् ।