देशभर पश्चिमी वायुको सामान्य प्रभाव कायमै रहेकाले आज मुलुकको पहाडी भूभागको केही ठाउँमा हल्का वर्षाको सम्भावना रहेको जल तथा मौसम विज्ञान विभागले जनाएको छ । उच्च पहाडी भूभागमा हल्का हिमपात हुनेछ । आज राति गण्डकी, लुम्बिनी र कर्णाली प्रदेशका पहाडी भूभागमा आंशिक बदली रहे पनि बाँकी भूभागमा मौसम सफा रहने छ । उच्च पहाडी भूभागको केही क्षेत्रमा हल्का हिमपातको सम्भावना छ । 

त्यस्तै, फागुन २६ गते शुक्रबार गण्डकी प्रदेशको पहाडी भूभागमा आंशिक बदली रही थोरै भूभागमा क्षणिक वर्षाको सम्भावना छ । बाँकी भूभागमा मौसम सफा रहने विभागले जनाएको छ । 

सोहीअनुसार फागुन २७ गते शनिबार कोशी र गण्डकी प्रदेशको पहाडी भूभागमा आंशिकदेखि सामान्य बदली रही एक दुई स्थानमा मेघ गर्जनसहित हल्का वर्षाको सम्भावना रहेको विभागको भनाइ छ । बाँकी भूभागमा मौसम सफा रहने छ । पहाडी भूभागको केही ठाउँमा हल्का वर्षा हुने र उच्च पहाडी भूभागका केही स्थानमा हल्का हिमपात हुने हुनाले चिसो बढ्ने भन्दै विभागले सतर्कता अपनाउन आग्रह गरेको छ ।