सत्तारुढ नेकपा (माओवादी केन्द्र)सहित कम्युनिष्ट पार्टी निकट किसानले रासायनिक मलखादको समस्या समाधानको माग राख्दै माइतीघरमा प्रदर्शन गरेका छन् । 

बुधबार काठमाडौंको माइतीघर मण्डलमा भएको प्रदर्शनमा सहभागी अखिल नेपाल किसान महासंघ क्रान्तिकारीका अध्यक्ष सीताराम तामाङले नेपाली किसानलाई राज्यले उपेक्षा गरेकाले सडक आन्दोलनमा आएको बताए।

उनले किसानलाई सरकारले समयमा नै मल बीउको समेत व्यवस्था नगर्दा किसानहरू समस्यामा परेको बताए।

उनले किसानले उत्पादन गरेको वस्तु बजार नपाउने तर विदेशबाट आयात गरेर खाने दलाल सरकारको कारण किसान दुःखी रहेको बताए। उनले यो आन्दोलन सातै प्रदेशमा गर्ने पनि बताए। 

त्यस्तै प्रदर्शनमा सहभागी अखिल क्रान्तिकारीकी उपाध्यक्ष सिलु न्यौपानेले नेपाल कृषिप्रधान देश भए पनि किसानहरूले किसान भएर बाच्न सक्ने अवस्था नभएको बताइन्।

उनले नेपाली किसानलाई सरकारले समयमा नै मल,बीउसमेत उपलब्ध गराउन नसकेको बताए। उनले किसानले उत्पादन गरेका वस्तुहरू सहज रूपमा बजार पाउने अवस्था नभएको भन्दै सरकारले उत्पादनको उचित मूल्य र बजारको व्यवस्था गरिदिनुपर्ने माग राखिन‍्। 

किसान संगठनहरूको लघुवित्त, मिटरब्याजी, रासायनिक मलखादको समस्या समाधान गर्नुपर्ने माग राखेका छन् ।

यस्तै उनीहरूले कृषिमा वैदेशिक लगानी हुन नहुने, भूमि बैंक खारेज गर्नुपर्नेलगायत माग राखेका छन् ।

प्रदर्शनमा माओवादीनिकट अखिल नेपाल किसान महासंघ (क्रान्तिकारी केन्द्र), नेकपा (एकीकृत समाजवादी) निकट अखिल नेपाल किसान महासंघ, नेकपा (मसाल) निकट अखिल नेपाल किसान महासंघ (अप्फा), नेकपा (क्रान्तिकारी माओवादी) निकट अखिल नेपाल किसान महासंघ (क्रान्तिकारी), नेपाल कम्युनिष्ट पार्टी निकट अखिल नेपाल किसान युनियन र नेकपा (माले) निकट अखिल नेपाल प्रगतिशील किसान संघको सहभागी रहेका छन् ।