संसदमा प्रधानमन्त्रीको जवाफ– नीति तथा कार्यक्रम राष्ट्रिय सहमतिको दस्तावेज

प्रधानमनत्री पुष्पकमल दाहाल प्रचण्डले संसदमा पेश भएको सरकारको वार्षिक नीति तथा कार्यक्रम राष्ट्रिय सहमतिको दस्तावेज बनेको दाबी गरेका छन् । नीति तथा कार्यक्रममाथि सांसदहरूले उठाएका प्रश्नको मंगलवार राष्ट्रिय सभा बैठकमा जवाफ दिँदै प्रचण्डले सरकारको नीति तथा कार्यक्रम राष्ट्रिय सहमतिको दस्ताबेज बनेको जिकिर गरेका हुन् । 

नेकपा एमाले समेतको समर्थनमा गठबन्धन बनेकोले प्रतिपक्षले पनि एक्सट्रिममा गएर विरोध गर्न नमिल्ने उनको दाबी छ । ‘यो पटकको नीति तथा कार्यक्रममा केही मौलिक विशेषता छन् । यो नीति तथा कार्यक्रम बनाउँदै गर्दा दुइवटा गठबन्धन बने । पहिलो गठबन्धनको सैद्धान्तिक प्राथमिकता र साझा न्यूनतम कार्यक्रम भनेर घोषणा गरिएको थियो । दोस्रो गठबन्धनले पहिलो साझा कार्यक्रमलाई समेत ध्यानमा राखेर अर्को कार्यक्रम तयार पार्‍यो । यथार्थमा भन्ने हो भने यो नीति तथा कार्यक्रम राष्ट्रिय सहमतिको कार्यक्रम बन्न पुगेको छ’ प्रचण्डले भने । 

सत्ता प्रतिपक्ष दुवैले समर्थन गरेको प्रधानमन्त्री हुनुको नाताले सरकारका नीति तथा कार्यक्रममा मौलिक विशेषता भेटिने उनले दाबी गरे । ‘हामी सत्ता पक्ष र प्रतिपक्षमा त छौं, यस्तो पृष्ठभूमिमा एक्सट्रिममा गएर विरोध गर्ने सैद्धान्तिक र नैतिक धरातल छैन । यो मौलिक विशेषतालाई ध्यान दिनुपर्छ,’ उनले भने ।